Shkruan: Florim Zeqa
Fjala e dalë nga goja e shpërfaqë shpirtin e njeriut nga brenda. Asnjëherë nuk ka qenë më e vështirë ta nxjerrësh fjalën që ta thotë zemra, pasi duhet peshuar mirë fjalën nga mendja. Fjala e mendjes dhe pendës së mprehtë e syrgjynos shpirtin e njeriut të ligë. Thënia e së vërtetës të ndihmon të përballesh me akuzat e gënjeshtarëve. Ai që s’e thotë të vërtetën është djall dhe hipokrit i madh.
Ja vlen të rrezikohet për të vërtetën
Andaj, çdo herë, para se ta them të vërtetën, bëhem gati t’i përballoj akuzat e gënjeshtarëve, mashtruesve dhe hipokritëve, për shkak se thënia e së vërtetës e ngrit rrezikun e jetës! Në ditët e sotme thënia e së vërtetës është e barabartë me akt revolucionar.
Në momentin që e thua të vërtetën, për një minutë të bëhen një qind e një mirë armiq, ndërsa nëse ua kamuflon të vërtetën dhe ua prezanton çfarë atyre ju pëlqen atëherë brenda një kohe relativisht të shkurtër ke për të ofruar rreth vetes shumë “miq”, ku të njëjtëve pas tre ditëve nëse ua thua përsëri të vërtetën lakuriqe, të sulmojnë me sharje dhe fyerje më ç‘njerëzore!
Për këtë arsye, asnjëherë nuk i mbajë ngatë zemrës çfarë thonë të tjerët, por jam i vëmendshëm çfarë u them paraprakisht unë atyre.
Ndjenja e brendshme apo gjendja shpirtërore të ofron besueshmëri, qëndrueshmëri dhe këmbëngulësi në tejkalimin e situatave konfliktuoze. Vetëbesimi është themeli i të gjitha arritjeve në jetë dhe forca për tejkalimin e vështirësive është tek gjendja shpirtërore.
Meditimi është mënyra më e mirë për të shmangur mendimet negative dhe për të mbushur mendjen tuaj me pozitivitet dhe kënaqësi shpirtërore.
Mos hezitoni ta thoni të vërtetën pavarësisht konsekuencave, pasi vetëm e vërteta e sjellë në të mirën. Njeriu duhet të vazhdojë të thotë të vërtetën dhe ta dëshmoj vërtetësinë e fjalës së vet, në të kundërtën bie në nivelin e gënjeshtarëve.
Kur fjala e njeriut përputhet me atë që ka në zemër, atëherë ajo e tregon kthjelltësinë e mendjes dhe shpirtit. Thënia e së vërtetës është instrumenti dhe argumenti më i mirë për të ndërtuar ardhmërinë e gjeneratave të reja, kurse gënjeshtra është mohim i së vërtetës dhe mjegullim i së ardhmes së shumë gjeneratave.
Durimi është aftësia e pritjes pa u mërzitur, pa u lodhur dhe pa u lakuar, është ruajtja e qetësisë shpirtërore në momentin kur ballafaqohemi me vështirësi. Durimi është virtyt i lartë i njeriut të vendosur, është një forcë e brendshme shpirtërore që e përgatit njeriun për tejkalimin e të gjitha sfidave jetësore. /2LONLINE/
