“Aderimet në partinë e Ramush Haradinajt në Gjilan nuk kanë të ndalur. Vetëm në ditët e fundit, AAK-së në këtë komunë i janë bashkuar emra të njohur nga të gjitha fushat, qytetarë të respektuar e familje të njohura”, ka bërë me dije se i pari i AAK-së në Gjilan, Nazim Gagica, i cili ka prezantuar sot, siç tha, aderimin më të ri, ish-asamblisitin më të votuar të PDK-së, Riza Abdyli.
“Aleancës për Ardhmërinë e Kosovës në Gjilan, prej sot i bashkohet më i votuari i PDK-së në këtë Komunë, afaristi i suksesshëm, Riza Abdyli. Ai ka qenë fillimisht anëtar i kryesisë së rinisë së PDK-së, dy mandate anëtar i kryesisë së partisë, ndërsa një mandat shef i grupit të këshilltarëve të këtij subjekti politik në Kuvendin Komunal në Gjilan”, ka njoftuar Gagica.
Ai ka shtuar se qytetarë nga të gjitha profilet po i bashkohen Aleancës sepse po e konsiderojnë si alternativa e vetme për ta qeverisur Komunën dhe shtetin.
“AAK-së në Gjilan i janë bashkuar një numër i madh kuadro prej kohës kur kjo degë ka pësuar ndryshime në strukturën e saj udhëheqëse.
“Të rinjë e të moshuar, juristë e ekonomistë, mjekë e afaristë, qytetarë të shumtë nga të gjitha profilet profesionale, po e shohin AAK-n si alternativën e vetme dhe më seriozja për të qeverisur me Komunën e me shtetin”, është shprehur Gagica. /2LONLINE/
