Jemi vetëm një ditë dhe më pak se 24 orë nga derbi më i madh lokal në Kosovë, mes Dritës dhe Gjilanit. Stadiumi i qytetit në Gjilan është në rinovim e sipër, tani e dy vite, ndërkohë që ky fakt edhe po e vështirëson organizimin e ndeshjeve kampionale dhe sidomos të ndeshjeve me përmasa më të mëdha.
Megjithatë, drejtuesit e FC Dritës, tashmë i kanë bërë të gjitha përgatitjet e duhura për këtë ndeshje, teksa pritet interesim i jashtëzakonshëm edhe nga jashtë vendit.
Feti Murseli, drejtor i përgjithshëm në klubin e Dritës tregoi se tashmë janë në përfundim e sipër të të gjitha punëve sa i përket organizimit të këtij derbi.
“Kemi bërë të gjitha përgatitjet e nevojshme për të organizuar një ndeshje me përmasa të mëdha siç është ajo ndërmjet Dritës dhe Gjilanit. Mungesa e hapsirave brenda stadiumit për mysafirët dhe gazetarët tashmë është evidente, por kemi bërë disa improvizime për këtë ndeshje për sektorin e gazetarëve dhe shpresojmë se gjithçka do të shkojë mirë, pasi që gazetarët do të kenë akreditimet e tyre dhe vendin e veçantë se ku do të ulen”, deklaroi fillimisht Murseli.
Ai më pas tregoi se për këtë përballje do të ketë mysafirë të shumtë edhe jashtë vendit, ndërkohë që nuk do të mungon as kasta politike.
“Kemi marrë kërkesa të shumta për këtë ndeshje. Ndoshta edhe rëndësia e saj e ka bërë të veten. Shumë kërkesa kanë ardhura nga jashtë vendit, teksa veçohen ardhja e disa ministrave dhe deputetëve nga Maqedonia e Veriut. Gjithashtu edhe kasta politike lokale dhe ajo qendrore priten që të jenë të pranishëm”, ka thene për Gazetën “Sheshi”.
Në fund Murseli foli edhe për derbin i cili do të zhvillohet në fushën e blertë, sepse derbin e organizimit të ndeshjes, Drita qysh tashmë e ka fituar.
“Presim në radhë të parë një spektakël futbolli. U bëj thirrje tifozërive për anim fer dhe korrekt dhe t’ia lëmë fushës së lojës për të treguar se kush është më i miri. Fituesi? Normalisht që ne si drejtues klubi presim fitore, pasi që objektivat tona janë të qarta dhe do të luftojmë deri në fund për ti arritur ato”, përfundoi Murseli.
Kujtojmë që dueli ndërmet Dritës dhe Gjilanit do të zhvillohet të dielen me fillim nga ora 13:00.
