Në prag të ndeshjes Shqipëri-Serbi që do luhet në “Elbasan Arena” më 8 tetor, trajneri i Kombëtares Shqiptare, Gianni De Biasi, ka folur për përgatitjet e fundit dhe emocionet e lojës.
Në një konferencë për shtyp ditën e sotme, tekniku Italian theksoi që takimi ndaj serbëve do të jetë i rëndësishëm për objektivin e kuqezinjve për të shkuar në “Euro 2016”, ndërsa ka theksuar se nuk e tremb aspak kjo ndeshje.
“Do të luajmë mundësinë tonë për të shkuar në Evropian. Shpresoj të jetë një ndeshje inteligjente dhe të japim atë që duhet të japin në atë fushë. Për këtë kemi mbledhur lojtarë që janë në formë të mirë fizike dhe sigurisht që do të japin zemrën siç e kanë dhënë deri tani. E rëndësishme është që të qëndrojmë dhe luajmë të bashkuar pasi kemi vetëm dy ditë kohë për tu stërvitur të martën dhe të mërkurën. Përsa u përket lojtarëve, ato që kam zgjedhur janë të sigurt që luajnë mirë”, u shpreh De Biasi, raportojnë mediat në Tiranë.
“Përfaqësuesja e Serbisë ka lojtarë cilësorë që luajnë në ekipe të mëdha në Evropë dhe unë i vlerësoj, por të jem i sinqertë nuk më tremb asgjë nga ai ekip. Është një skuadër e fortë dhe ne do të mundohemi të përballemi mirë në këtë aspekt”, vijoi më tej.
Ndër të tjera kreu i pankinës kuqezi foli dhe për sfidën e humbur ndaj Portugalisë, ku nuk harroi të nënvizojë 2 minutat e fundit të ndëshkimit.
“Nuk jam i kënaqur me lojën që zhvilluam me Portugalinë. Ishte një gabim, por sot jemi këtu për të folur për tjetër gjë, futbolli kështu është, me humbje e fitore. Por duhet të përqendrohemi tek minutat e fundit, s’duhet t’i harrojmë siç bëmë me Portugalinë”, u shpreh De Biassi.
