Buxheti i komunës për 2025, top ping pongu!
Vazhdojnë zhvillime të reja sa i përket çështjes së buxhetit të Komunës së Gjilanit për vitin 2025, çështje kjo që ka krijuar ngërçin, e që, sa duket se është afër zgjidhjes, po aq është edhe larg saj.
Derisa kryesuesi i kuvendit komunal, Kushtrim Kadriu ka ftuar për datë 25 shkurt (ora 11:00), mbledhje të Komitetit për Politikë dhe Financa dhe këshilltarët Komunal, në dëgjim publik lidhur me propozim buxhetin e komunës për vitin 2025, në anën tjetër kryetari i Komunës së Gjilanit, Alban Hyseni tha se do të ftojë seancë urgjente po më 25 shkurt (0ra 14:00), për aprovimin e buxhetit të Komunës së Gjilanit për vitin 2025.
LEXO EDHE: Buxheti I komunës për 2025 – Kryesuesi I kuvendit ndërmerr edhe një veprim tjetër…
Rikujtojmë se ditë më parë edhe u mbajtë një takim me pjesëmarrës të kryetarëve të LDK-së, PDK e Vetëvendosjes në Gjilan, i ftuar nga kryesuesi i Kuvendit.
“Jemi në javën e fundit, kur Kuvendi Komunal mund dhe do të duhet të votojë buxhetin e qytetit tonë për vitin 2025. Në takimin e fundit me partitë politike opozitare në Gjilan na është kërkuar që i gjithë procesi i aprovimit të buxhet të rifillojë nga e para edhe pse, ne kemi mbajtur dëgjimet buxhetore dhe kemi ndjekur çdo hap ligjor për aprovimin e buxhetit”, ka thënë kryetari Hyseni, transmeton 2LONLINE.com.
I pari i komunës s ëGjilanit tha se opozita nuk mori pjesë në asnjë dëgjim buxhetor dhe nuk dërgoi asnjë propozim të vetëm.
“Më pas, ne e kemi dërguar buxhetin drejtuar Kuvendit komunal, por deri më tani, pra në javën e fundit të afatit ligjor, nuk është aprovuar buxheti i komunës”, thotë Hyseni.
Sipas tij, tani, kur ditët janë të numëruar, është tepër vonë dhe jashtë çdo afati ligjor për dëgjime buxhetore apo procedura tjera.
Prandaj, thotë i pari i komunës më datën 25 shkurt, pra vetëm tri ditë para përfundimit të afatit ligjor do të thërrasin një seancë tjetër urgjente për aprovimin e buxhetit.
“U bëjë thirrje partive politike dhe të gjithë asambleistëve të kuvendit komunal të Gjilanit që të votojnë për dhe ta aprovojnë buxhetin e qytetarëve të Gjilanit”, ka thënë Alban Hyseni, kryetar i Komunës së Gjilanit. /2LONLINE/