Buxheti i komunës për 2025 – Kryesuesi i kuvendit ndërmerr edhe një veprim tjetër…
Pasi ditë më parë, kryesuesi i Kuvendit Komunal të Gjilanit, Kushtrim Kadriu kishte organizuar një takim ku ia kishte arritur t’i ulë bashkë, kryetarët e subjekteve politike në Gjilan (LDK, PDK e Vetëvendosje), për t’u diskutuar çështja e miratimit të buxhetit për vitin 2025, e për t’u marr vesh për tejkalim të ngërçit, ai sot ka ftuar Komitetin për Politikë dhe Financa dhe këshilltarët Komunal në dëgjim publik lidhur me propozim buxhetin e komunës për vitin 2025.
“Të nderuar qytetarë të Komunës së Gjilanit, në cilësinë e Kryetarit të Kuvendit Komunal të Gjilanit, ju njoftoj se kam ftuar Komitetin për Politikë dhe Financa “KPF” dhe këshilltarët Komunal në dëgjim publik lidhur me propozim buxhetin e komunës për vitin 2025”, ka bërë me dije, kryesuesi Kushtrim Kadriu, përmes një njoftimi publik.
Bëhet e ditur se ky takim është ftuar për datë 25 shkurt, ora 11:00, në sallën e Kuvendit Komunal.
“Sipas rekomandimit të MAPL, ky dëgjim publik ka për qëllim gjithëpërfshirjen e përfaqësuesve të qytetarëve në procesin vendimmarrës dhe sigurimin që buxheti i komunës të reflektojë nevojat dhe prioritetet e qytetarëve tanë”, ka thënë Kadriu.
Mbetet të shihet se si do të rrjedhin gjërat tutje. /2LONLINE/