Shkruan: Sami Arifi
Lajmi i hidhur që ka ndërruar jetë arsimtari, mësimdhënësi, veprimtari i madh i çështjes kombëtare, Njazi Hajdari, është dhembje e thellë, jo vetëm për familjen e tij, por për të gjithë atdhetarët e përkushtuar si ai, të cilët frymëzuan masën e gjerë popullore për kauzën e madhe kombëtare…
Arsimtari shumëvjeçar, Njazi Hajdari, ishte nga fshati Tërpezë i komunës së Vitisë, shkollën fillore e fillojë në fshatin e tij të lindjes, ndërsa mbarojë në fshatin e Pozheranit, meqë në fshatin e tij ishte vetëm cikli i ultë i shkollimit, shkollën e Normales ai e kreu në qytetin e Gjilanit. Njaziu ishte i lindur nga një familje me taban atdhetar, i edukuar në odat shqiptare me ide përparimtare liridashëse.
Arsimtar Njazi Hajdari ishte edukator i shkëlqyer dhe mbi të gjitha misionar i ndërgjegjësimit dhe zgjimit kombëtar duke pri edhe vet në radhët e para në këtë rreshtim, prandaj ai i tillë ishte therrë në sy të armikut shekullor serbosllav si dhe të bashkëpunëtorëve të tyre…
Njaziu me sukses të plotë e kreu detyrën e administratorit në Këshillin Komunal për Financim në Ferizaj gjatë Luftës në Kosovë, ai gjatë ndërhyrjes së forcave të NATO-s ndaj caqeve serbe u kap nga paramilitarë dhe milicë serb, u torturua skajshmërish dhe u mbajt mbi katër muaj i burgosur deri në hyrjen e trupave paqësore të forcës ushtarake të NATO-s në Kosovë.
Njaziu ishte i pathyer dhe pafundësisht i dinjitetshëm për çështjen kombëtare.
Mungesa e arsimtarit Njazi Hajdarit gjithmonë do të jetë zbrazësi e veprimit shumëdimensional në rrafshin kombëtar…
Qoftë i paharruar kujtimi për arsimtarin Njazi Hajdari, pushoftë i qetë në dritën e pashtershme në amshim… /2LONLINE/
