Në vigjilje të hapjes së kampanjës 2024/25 është paraqitur para mediave edhe kryetrajneri i SC Gjilanit, Ardian Nuhiu. Tekniku i kuqebardhëve vuri në theks objektivin e drejtuesve të klubit duke nisur nga sinqeriteti dhe deri te suksesi.
Sipas tij, puna dhe disiplina do jenë shtyllat kryesore të këtij cikli të ri, ndërkohë që synohet ngritja e skuadrës në nivelet më të larta konkurruese.
“Projekti është shumë i qartë dhe mënyra e komunikimit së bashku me drejtuesit janë faktori kryesor dhe faktori bindës që unë jam këtu për të udhëhequr këtë projekt. Ne së bashku me stafin teknik kemi një plan të cilin synojmë ta implementojmë nga viti në vit, në mënyrë që kjo skuadër të ngritet në nivelet më të larta, së bashku me presidentin dhe drejtuesit të cilët do të punojnë maksimalisht në këtë drejtim”, ka thënë Nuhiu.
“Oferta ishte shumë e pastër, shumë korrekte dhe shumë e menduar mirë nga drejtuesit, duke përcaktuar udhëheqësit e këtij projekti. Sa i përket pjesës së kaluarës time, unë gëzoj respekt gjithmonë për ish-drejtuesit, për tifozët dhe vetë klubin. Por, tani jam këtu, bashkërisht me stafin tim për të punuar për Gjilanin. President, drejtues, futbollistë dhe tifozë duhet të bëhemi të gjithë një për të shkruar historinë”, ka thënë tutje ai.
Nuhiu tha se ideja e vitit të parë është ndërtimi i skuadrës me një organizim të madh, do të kërkohen edhe objektiva, mirëpo jo me çdo kusht. Sipas tij, futbolli është një proces që do kohë, në përbërje do të kemi shumë ndryshime dhe ne nuk e kemi shkopin magjik për ta bërë atë menjëherë. Do mundohemi me stafin që t’i përcjellim idetë tona te futbollistët, në mënyrë që të ambientohen sa më shpejtë”.
“Do të mundohemi të ngrisim ekipin në të gjitha nivelet. Nuk do premtojmë që do të marrim këtë sukses, apo atë sukses, por do të punojmë për të arritur atë sukses, pasi që për këtë arsye jemi këtu. Ambiciet na kanë bashkuar me drejtuesit. Duhet të jemi me këmbë në tokë, më shumë të punojmë se sa të flasim. Duhet të ja lëmë gjithçka kohës. Premtoj shumë punë dhe disiplinë, si nga ana ime, po ashtu edhe nga ana e stafit tim. Do të analizojmë çdo detaj më të vogël, në mënyrë që ekipi të hec në mënyrën më të drejtë. Besoj fuqishëm në punën tone dhe besoj që do të arrijmë sukseset nga puna jonë” ka thënë tutje Nuhiu, trajneri i SC Gjilanit.
Ai tha edhe se fokusin do ta kenë edhe nga futbollistët e rinj. Do të shikojnë se çfarë mund të afrojnë nga ekipi i 21-vjeçarëve, por do t’i ndjekim ndeshjet edhe të moshave të tjera. /2LONLINE/
