Ambasada amerikane në Kosovë ka përgëzuar të gjithë votuesit në zgjedhjet e së dielës, të cilët ”ndihmuan në krijimin e së ardhmes së vendit të tyre”.
Në një komunikatë për shtyp, ambasada amerikane ka përmendur edhe raportimin e parregullsive nga ana e qytetarëve tek autoritetet kosovare, duke e cilësuar këtë si ”besim ndaj ndaj institucioneve kosovare të sundimit të ligjit, si dhe përkushtimin e sinqertë për zgjedhje transparente dhe të besueshme”.
Ambasada ka dënuar ndërkaq ”veprimet e dhunës dhe frikësimit që njollosën zgjedhjet e djeshme komunale në Mitrovicën e Veriut”.
”Të gjithë qytetarët kanë të drejtë të marrin pjesë në zgjedhje të qeta e të sigurta, të cilat duhet të jenë pa dhunë dhe frikësim. Bashkësia ndërkombëtare nuk do t’i tolerojë përpjekjet për ta prishur procesin demokratik dhe për t’i penguar qytetarët të përzgjedhin përfaqësuesit e tyre në mënyrë të rregullt”, thuhet në komunikatë.
Duke e cilësuar Kosovën si demokraci të re, e cila ”meriton zgjedhje të cilat pasqyrojnë vullnetin e vërtetë të qytetarëve”, Ambasada e SHBA-ve nënvizon se ”edhe pse, mbetet ende edhe shumë punë, këto zgjedhje kanë vënë themelet që liderët politik ta kryejnë një reformë të mirëfilltë zgjedhore”./rtklive.com/
