Zyrtare: Zekirija Ramadani emërohet shef i shtabit teknik

Sport Club Gjilani njofton se ka arritur marrëveshje me trajnerin Zekirija Ramadani, i cili do të udhëheqë shtabin teknik të skuadrës gjilanase deri në vitin 2028.

“Rikthimi i Ramadanit në Gjilan përfaqëson vazhdimësinë e një bashkëpunimi të njohur, duke pasur parasysh përvojën e tij të mëparshme në drejtimin e skuadrës kuqe e bardhë. Në edicionin 2022/23, nën drejtimin e tij, Gjilani siguroi pjesëmarrjen në garat evropiane dhe arriti deri në finalen e Kupës së Republikës së Kosovës”, thuhet në njoftimin zyrtar të SC Gjilanit.

Më tej thuhet se: Me një karrierë të pasur dhe një bagazh të rëndësishëm suksesesh, Zekirija Ramadani vjen te Gjilani si një trajner me përvojë të dëshmuar, i cili numëron pesë tituj kampioni të fituar me katër klube të ndryshme.

Përvoja, njohja e ambientit dhe ambicia për të arritur objektiva të rëndësishëm përbëjnë bazën e këtij bashkëpunimi, i cili synon të sjellë stabilitet, konkurrueshmëri dhe rezultate në përputhje me pritshmëritë e klubit dhe tifozëve tanë.

“Sport Club Gjilani i uron mirëseardhje trajnerit Zekirija Ramadani dhe i dëshiron suksese në drejtimin e skuadrës, me bindjen se së bashku do të punojmë për ta çuar klubin drejt objektivave të përcaktuara”, thuhet në fund të njofitmit zyrtar të skuadrës “kuq e bardh”. /2LONLINE/