Zyra për Informim Publik pjesëmarrës në trajnimin mbi aftësitë komunikuese

(2L ONLINE) – Në bazë të kërkesave të Zyrtarëve Komunal për Informim, një trajnim profesional një-ditor mbi Aftësitë Komunikuese është organizuar për zyrtarët komunal të informimit, shoqërisë civile dhe përfaqësuesve të mediave në rajonin e Gjilanit.

Trajnimi kishte për qëllim të rrisë ndërgjegjësimin dhe të zhvillojë kapacitetet e zyrtarëve të informimit, përfaqësuesve të shoqërisë civile dhe mediave lidhur me transparencën dhe komunikimin me publikun.

Ne trajnim morën pjesë 18 zyrtarë komunal nga 11 komunat e rajonit, e që merren me informacionin publik dhe aktivitetet në terren e ndër ta ishte edhe Zyrtari për Informim Publik në Komunën e Vitisë, Mustafë Mehmeti.

Metodologjia interaktive e aplikuar gjatë trajnimit i mundësoi pjesëmarrësve që të përqendrohen në përmirësimin e teknikave të kontaktimit, hartimit të lajmeve, komunikatave për shtyp dhe raportimin e aktiviteteve komunale.

Trajnimi ishte pjesë e projektit”Mbështetje për qeverisjen lokale në Kosovë”, zbatuar nga Misioni i OSBE-së në Kosovë, i cili është duke zbatuar një seri aktivitetesh që synojnë forcimin e transparencës komunale përmes komunikimit të zgjeruar komunal me strukturat jo qeveritare dhe publikun./2L ONLINE/