Zhegra mban tubim përkujtimor në nderim të martirëve të rënë në vitin 1999

/2L ONLINE/ – Zhegra të enjten do t’i përkujtojë martirët në 17 vjetorin e vrasjeve në këtë fshat nga ana e ushtrisë serbe. Nga ky tubim sërish do të përsëritet kërkesa që kriminelët dhe ata që dhanë urdhra të dalin para drejtësisë.
Në fshatin Zhegër ushtria serbe e cila ndihmohej edhe nga serbët vendës kishte vrarë, Sipas të dhënave që kanë grumbulluar Këshilli i bashkësisë vendore në Zhegër në periudhën mars-qershor 1999 në këtë fshat janë vrarë 13 qytetarë dhe janë plagosur 7 të tjerë, thuhet në njoftimin e Këshilli Organizativ – Zhegër

“Sa herë që kujtojmë dëshmorët kujtojmë sakrificën dhe heroizmin e tyre. Vepra dhe heroizmi i tyre na bënë që ne sot të ndjehemi krenar. Pa gjakun e derdhur të atyre që u flijuan , as liria nuk do ta kishte kuptimin, e gjaku i derdhur i dëshmorëve dhe martirëve qëndron i stolisur në themelet e lirisë, e ne sot i nderojmë dhe përkujtojmë me pietet, sot në 17 vjetorin e rënies po përkujtojmë ata që u sakrifikuan e flijuan jetën e tyre për lirinë e atdheut.
Muajt mars, prill e maj të vitit 1999 ishin muajt më të përgjakur, kur në altarin e lirisë ranë shumë dëshmorë dhe shumë martirë të tjerë.”, thuhet tutje në njoftim.

Ne të gjallët kemi obligim të përkulemi pranë varreve dhe veprës së tyre madhore sot e përgjithmonë, thuhet në njoftimin e Këshillit Organizativ – Zhegër . Përndryshe, aktivitetet që do të shënojnë këtë organizim përkujtimor do të nisin me vizitën dhe homazhet te varrezat e martirëve (ora 15 e 30) për të vazhduar me tubimin përkujtimor që fillon në ora 17:00, në shkollën fillore “Agim Ramadani”. /2L ONLINE/