Zgjidhja është në Kuvend

Ish-kryetari i Kuvendit të Kosovës, njëherësh kryetar i Këshillit Kombëtar të Nismës për Kosovën, Jakup Krasniqi, ka thënë se zgjidhja e ngërçit politik është në Kuvend.

Në një intervistë për “Epokën e re”, Krasniqi ka thënë se Kosova nuk ka nevojë për kompromis në mes të partive politike pasi, sipas tij, tashmë ekziston koalicioni qeverisës i përbërë nga LDK-ja, AAK-ja, Vetëvendosje! dhe Nisma.

“Kosova nuk ka nevojë për kompromise, pasi blloku qeverisës është formuar. Kjo u pa edhe më 18 shtator 2014. Pas 18 shtatorit gjërat janë të qarta”, ka deklaruar Krasniqi.

Sipas tij, tashmë një pjesë e politikës sonë ka arritur në këto rrethana ta sjellë një frymë të re politike. “Është krijuar një bashkim i ri politik nga shumica e partive politike shqiptare për ta ndryshuar qeverisjen në vend pa asnjë ndërhyrje nga jashtë”, është shprehur Krasniqi.

Ai e ka kritikuar Gjykatën Kushtetuese për vendimin që ka dhënë në raport me seancën konstituive të 17 korrikut. “Për Gjykatën Kushtetuese kam dhënë mendimin tim. Ajo ka nxjerr një vendim antikushtetues dhe e ka legjitimuar kapjen e institucionit më të lartë të shtetit, Kuvendin”, ka thënë Krasniqi.

Krasniqi ka folur edhe për mundësinë e përfshirjes së ndërkombëtarëve në zgjidhjen e ngërçit politik. Ai ka thënë se ndërhyrjet ndërkombëtare nuk mund të sjellin kualitet institucional.

“Nuk besoj se ndërhyrjet nga jashtë sjellin kualitet institucional, së paku këtë nuk e kemi parë deri më tani. Askush më mirë se ne nuk e di se çka kanë prodhuar ndërhyrjet që ndodhën në zgjedhjet e kaluara”, ka shtuar Krasniqi. Në këtë kontekst, Krasniqi ka bërë me dije se nuk ka arsye që Kosova të shkojë në zgjedhje të reja. “Kosova e as qytetarët e saj nuk e kanë asnjë arsye të shkojnë në zgjedhje, pasi në zgjedhje shkohet për të krijuar një shumicë parlamentare. Këtë shumicë e kemi dhe është mjaft solide”, ka deklaruar Krasniqi.

Intervistën e plotë mund ta lexoni në numrin e sotëm të gazetës “Epoka e re”