Zëvendësministri Syla priti pjesëmarrësit e Kursit të Lartë për Sigurinë dhe Mbrojtjen nga Kolegji i Mbrojtjes dhe Sigurisë të Shqipërisë

Zëvendësministri i Mbrojtjes, Shemsi Syla, i shoqëruar nga zëvendëskomandanti i FSK-së, gjeneral major Enver Cikaqi, dhe drejtori i Departamentit për Inteligjencë dhe Siguri, gjeneral major Gëzim Hazrolli, pritën sot pjesëmarrësit e Kursit të Lartë për Sigurinë dhe Mbrojtjen nga Kolegji i Mbrojtjes dhe Sigurisë të Forcave të Armatosura të Shqipërisë.

Duke i uruar mirëseardhjen pjesëmarrësve, zëvendësministri Syla nënvizoi rëndësinë e këtij kursi për avancimin profesional të personelit ushtarak dhe civil në fushën e mbrojtjes dhe sigurisë. Ai vlerësoi lart pjesëmarrjen e Kosovës, duke e cilësuar si një dëshmi të bashkëpunimit të ngushtë me Shqipërinë dhe vendet aleate. Gjithashtu, zëvendësministri theksoi nevojën për rritjen e kapaciteteve mbrojtëse të Kosovës në një ambient sigurie që po ndryshon, ku sfidat rajonale dhe globale kërkojnë koordinim të qëndrueshëm dhe shkëmbim të vazhdueshëm të njohurive strategjike.

Komandanti i Kolegjit të Mbrojtjes dhe Sigurisë, gjeneral brigade Ylli Pulaj, falënderoi për mikpritjen dhe informoi zëvendësministrin Syla se këtë vit Kursi i Lartë për Sigurinë dhe Mbrojtjen (KLSM-15) ka 18 pjesëmarrës nga institucionet e mbrojtjes dhe sigurisë në vend, si dhe nga Forcat e Armatosura të Kroacisë, Gjeorgjisë, Hungarisë, Italisë, Turqisë dhe Kosovës.

Gjeneral Pulaj theksoi se ky kurs ofron njohuritë e nevojshme mbi sfidat e sigurisë dhe mënyrat e menaxhimit të tyre në një kontekst afatgjatë, duke e bërë të domosdoshëm për kandidatët që synojnë avancimin në pozicione të larta ushtarake, diplomatike dhe institucionale.

Kursi zhvillohet në bashkëpunim me lektorë nga Qendra Marshall në Gjermani, Kolegji i Mbrojtjes së NATO-s, Qendra për Studime të Avancuara dhe Instituti për Studime Globale në Romë, Departamenti i Shërbimeve nga Universiteti i Washington DC, Universiteti “Beyazit”, Ankara, Turqi, Komiteti Ushtarak i Bashkimit Evropian, si dhe ambasadorë dhe përfaqësues të lartë, të ftuar nderi (Guest speaker) nga institucionet e sigurisë dhe mbrojtjes së Kosovës, NATO-s dhe vendeve partnere. /2LONLINE/