Zëvendësministri Syla priti në takim lamtumirës atasheun britanik nënkolonelin Green
Zëvendësministri i Mbrojtjes, Shemsi Syla, priti në takim lamtumirës atasheun e mbrojtjes së Mbretërisë së Bashkuar, nënkolonel Edward John Green me rastin e përfundimit te misionit të tij në Kosovë.
Me këtë rast, zëvendësministri i shprehu falenderim për punën, angazhimin dhe kontributin e dhënë gjatë kohës së shërbimit në Kosovë si atashe i mbrojtjes.
Zëvendësministri u shpreh se nënkoloneli Green përfaqësoi një shtet mik që ka dhënë kontribut të çmuar për shtetin tonë, sidomos në fushën e mbrojtjes dhe të sigurisë, në ngritjen e kapaciteteve ushtarake, si në edukim, stërvitje dhe trajnim.
Gjatë mandatit të nënkolonelit Green, ushtarët e Forcës së Sigurisë së Kosovës kanë pasur mundësinë të përfshihen në trajnimin e ushtarëve ukrainas në Angli, për t’u përgatitur për luftën në Ukrainë. Gjithashtu, në takim është diskutuar edhe për meritat e atasheut britanik lidhur me zhvillimin e FSK-së, si dhe përforcimin dhe avancimin e marrëdhënieve bilaterale në sferën ushtarake.
Në fund të takimit, nënkoloneli Green u falënderua për pritjen dhe theksoi mbështetjen e Mbretërisë së Bashkuar në forcimin dhe zhvillimin e kapaciteteve operacionale të Forcës së Sigurisë së Kosovës, në përmbushjen e objektivave të saj. /2LONLINE/