Zëvendësministri Shkodra vizitoi Sektorin për hetimin e krimeve kibernetike në Policinë e Kosovës

Zëvendësministri i Ministrisë së Punëve të Brendshme z. Selami Shkodra në kuadër të vizitave të rregullta, sot ka vizituar Policinë e Kosovës, përkatësisht Sektorin për hetimin e krimeve kibernetike që është i strukturuar në kuadër të Drejtorisë për Hetimin e Krimit të Organizuar.

Gjatë këtij takimi Zëvendësministri Shkodra ofroj mbështetjen e tij për Sektorin e hetimit të krimeve kibernetike në luftimin e krimit kibernetikë dhe dukurive të tjera që rrjedhin nga kërcënimet e sigurisë kibernetike, duke paraqitur edhe nevojën për ngritje të kapaciteteve teknike dhe profesionale në luftimin e këtyre dukurive në Republikën e Kosovës.

Në anën tjetër Drejtori i Drejtorisë për Hetimin e Krimit të Organizuar z. Rexhep Fetahu dhe Udhëheqësi i sektorit për hetimin e krimeve kibernetike z. Fadil Abdyli, e njoftuan zëvendësministrin Shkodra për punën dhe angazhimin e dikastereve që udhëheqin në luftimin e këtyre dukurive, të cilat bazuar në statistikat e paraqitura janë në rritje e sipër dhe paraqesin një sfidë jo vetëm për vendin tonë. Megjithatë falë bashkëpunimit të mirë më shumë institucione ndërkombëtare janë duke u zgjidhur shumë raste në të cilat si mjet i kryerjes së veprave përdoret sistemi kompjuterik.