Zëvendësministri i Kulturës, Rinisë dhe Sportit, Rexhep Hoti, ka takuar nxënësit e gjimnazit shkencor “Hasan Nahi” në Prishtinë, të cilët përfaqësuan Kosovën në Olimpiadën Shkencore “Golden Climate” në Nairobi, Kenia, e të cilët madje u shpërblyen me medalje ari në fushën e Agrikulturës.
Nxënësit, Blerim Jashari, Nehar Shala, Rinor Baxhuku, të shoqëruar edhe nga profesori i fizikës, Fatih Karaosmanoglu, u paraqitën në olimpiadë me projektin e tyre të veçantë, “Usage of Sunflower Stalk and Pine Cone as a Humidified Fertilizer” përkrah 30 shteteve të botës që ishin pjesëmarrës.
Zëvendësministri Hoti përgëzoi studentët dhe profesorin për arritjen e cila sipas tij tregon më së miri se Kosova ka studentë të mirëfilltë, të cilët suksesshëm po e prezantojnë vendin në organizimet e ndryshme ndërkombëtare.
Ky projekt, të cilin e ka mbështetur edhe Ministria e Kulturës, Rinisë dhe Sportit, i solli Kosovës një medalje të artë, e që sipas zëvendësministrit Hoti është edhe një motiv për të vazhduar tutje me suksese dhe prezantimin sa më të denjë të vendit.
Ndërkaq, Fatih Karaosmanoglu, profesor i fizikës në gjimnazin “Hasan Nahi” falënderoi zëvendësministrin Hoti për pritjen edhe theksoi rëndësinë e mbështetjes së një projekti të tillë nga ana e MKRS-së.
Ai tha se prezantimi i Kosovës në Olimpiadën Shkencore në Kenia ka mahnitur juritë ndërkombëtare.
Karaosmanoglu, theksoi se gjatë olimpiadës, veçmas suksesit me projektin e tyre, nxënësit nga Kosova kanë pasur mundësinë të tregojnë për kulturën e mirëfilltë të vendit dhe të njihen me nxënës të shteteve të ndryshme.
Me të njëjtin projekt, nxënësit e gjimnazit “Hasan Nahi” do ta prezantojnë Kosovën në një organizim të ngjashëm shkencor më 12 qershor në Amerikë.