Zëvendëskryetari Aliu priti në takim aktorin dhe regjisorin Adem Kica

Zëvendëskryetari i Komunës së Vitisë, Hasan Aliu, ka pritur sot në një takim të veçantë aktorin, regjisorin dhe pedagogun e njohur të artit, Adem Kica, i cili jeton dhe vepron në Cyrih të Zvicrës.

Gjatë këtij takimi miqësor e frytdhënës, z. Aliu vlerësoi lart punën dhe kontributin shumëvjeçar të artistit Kica në promovimin e artit shqiptar jashtë vendit, veçanërisht në fushën e filmit dhe teatrit. Ai theksoi se figurat si Adem Kica janë ambasadorë të denjë të kulturës sonë kombëtare, të cilët me përkushtim profesional dhe artistik i japin zë identitetit shqiptar në diasporë.

“Është kënaqësi dhe nder për komunën tonë të presim një personalitet të tillë të artit dhe kulturës, i cili me veprën e tij ka lartësuar emrin e shqiptarëve në Zvicër dhe më gjerë. Adem Kica është shembull frymëzimi për brezat e rinj”, u shpreh zëvendëskryetari Aliu.

Në shenjë mirënjohjeje për kontributin e tij të çmuar në fushën e kulturës dhe artit, z. Aliu i dorëzoi zyrtarisht artistit Adem Kica një mirënjohje nga Komuna e Vitisë.

Nga ana e tij, z. Kica u shpreh i emocionuar dhe falënderues për këtë vlerësim, duke theksuar se ndjehet gjithmonë i lidhur me vendlindjen dhe se do të vazhdojë të angazhohet për promovimin e kulturës shqiptare kudo që vepron.

Adem Kica është një emër i njohur në qarqet artistike evropiane. Ai është pedagog në Akademinë për Film dhe Teatër në Cyrih, ku prej vitesh edukon dhe udhëheqë gjenerata të reja artistësh me përkushtim e profesionalizëm. Kontributi i tij për artin shqiptar dhe përfaqësimi i denjë në diasporë, janë dëshmi e një rruge të suksesshme krijuese. /2LONLINE/