Zëvendëskryeministri Bislimi e vlerëson lartë mbështetjen e Luksemburgut

Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, priti në takim shefin e misionit të Luksemburgut në Kosovë, Eric Dietz.

Në takim u bisedua mbi rritjen e intensitetit të bashkëpunimit bilateral mes dy vendeve tona, si vazhdimësi pas nënshkrimit në muajin korrik të Marrëveshjes Dypalëshe për Bashkëpunimin për Zhvillim dhe Memorandumin e Mirëkuptimit.

Zëvendëskryeministri Bislimi tha se e vlerëson lartësisht mbështetjen e Luksemburgut në fusha si arsimi, shëndetësia, inovacioni dhe teknologjisë informative. U përmendën arritjet e Kosovës si rritja ekonomike dyshifrore, avancimi me 17 pozicione në Transparency International si disa prej treguesve që demokracia cilësore shkon bashkë me zhvillimin ekonomik.

Z. Dietz u shpreh i kënaqur që ndodhet në Kosovë, në një vend me miqësi jetëgjatë me Luksemburgun. Ai tha se është i impresionuar me potencialin e Kosovës, aftësitë, moshën mesatare të re të popullsisë, mundësitë e shumta të investimit dhe bashkëpunimit nën një vizion të përbashkët. Z. Dietz riafirmoi mbështetjen e Luksemburgut për perspektivën evropiane të Kosovës.
Zëvendëskryeministri Bislimi e falënderoi z. Dietz për vizitën, mbështetjen e vazhdueshme dhe bashkëpunimin e frytshëm. /2LONLINE/