Zeka: Mësimi ka filluar në Gjilan por ditarët e klasës mungojnë

“Viti i ri shkollor ka filluar në Gjilan. Nxënësit janë në banka, mësimdhënësit kanë nisur punën, por ditarët e klasës ende nuk janë siguruar”, ka thënë në një reagim të tij, Izmi Zeka nga Partia Demokratike e Kosovës (PDK).

Zeka, që ka dikur ka ushtruar edhe detyrën e zëvendësministrit, ka thënë se ditarët e klasës janë një dokument themelor i procesit mësimor, në to evidentohen orët e mbajtura, mungesat e nxënësve, notat, vlerësimi dhe të dhëna të tjera të rëndësishme për mbarëvajtjen e procesit edukativo-arsimor.

“Mungesa e tyre që në ditët e para të shkollës është një problem që duhet të zgjidhet menjëherë. Shkollat dhe mësimdhënësit nuk mund të fillojnë një vit të ri shkollor pa mjetet bazë për dokumentimin dhe organizimin e punës”, ka thënë tutje Zeka.

Sipas tij, Drejtoria e Arsimit në Gjilan duhet të japë përgjigje dhe të ndërmarrë masa konkrete, në mënyrë që kjo çështje të zgjidhet sa më shpejt.

“Fillimi i vitit shkollor kërkon organizim dhe përgjegjësi, jo mungesa që vështirësojnë punën e mësimdhënësve”, ka thënë në fudn të reagimit Izmi Zeka nga PDK-ja. /2LONLINE/