Zëvendësministri për Komunitete dhe Kthim, Izmi Zeka, ka kujtuar heroin Agim Ramadani në 17-vjetorin e rënies së tij, duke thënë ndër tjerash se pjesa më e rëndësishme dhe kapitale ishte qasja e drejtë e Agim Ramadanit për çlirimin e Kosovës nga pushtuesi serb, qasje kjo që i jep ngjyrë filozofisë së tij drejt një Kosove të lirë. I pashmangshëm gjatë tërë jetës së tij është aspekti kombëtar, ku edhe vetë akti i flijimit paraqet kurorën e përpjekjeve të tij drejt thyerjes së kufirit Kosovë-Shqipëri.
Ja postimi i plotë i Zekës në profilin e tij.
“Sot është një ditë e veçantë në historinë shqiptare e në veçanti atë kosovare. 11 prilli një rënie me vetëdije. Agim Ramadani apo çlirimi i Kosovës kjo është biografia e tij.
Në promovimin e librit të Agim Ramadanit “Një jetë tjetër”, Ismajl Syla ndër të tjera shprehet: “Vetëm aktet e larta të sakrificës botën e gjerë e mbushin me kryevepra që nuk janë të shumta mbi këtë botë. Një urtësi e lashtë thotë se të gjitha veprat e mëdha ngrihen mbi gjak, mbi djersë dhe mbi vetminë. Vepra e parë është e kryengritësit, luftëtarit, rebelit, revolucionarit, vepra e dytë është e punëtorit, ndërsa vepra e tretë është e filozofit, e dijetarit, e njeriut të penës së mprehtë dhe të mendimit të thellë”.
Vërtetë tërë krijimtaria si në poezi ashtu edhe në artin e pikturës paraqet brumin dhe kulturën e gjerë të Agim Ramadanit.
Pjesa më e rëndësishme dhe kapitale ishte qasja e drejtë e Agim Ramadanit për çlirimin e Kosovës nga pushtuesi serb, qasje kjo që i jep ngjyrë filozofisë së tij drejt një Kosove të lirë. I pashmangshëm gjatë tërë jetës së tij është aspekti kombëtar, ku edhe vetë akti i flijimit paraqet kurorën e përpjekjeve të tij drejt thyerjes së kufirit Kosovë-Shqipëri.
Agim Ramadani natyrshëm u kushton poezi figurave të mëdha kombëtare si Idriz Seferit, Azem Bejtës, Bajram Currit, Hasan Alisë… dhe në këtë mënyrë mishërohet me idealet e tyre duke spikatur si në piramidë madhështinë e tyre. Në poezinë e tij “Patjetër do të vij”, ndër të tjera shkruan “Nëse nuk shihemi /dhe na ndan vdekja / jetoje jetën Nënë / Patjetër do të vij””.