Zbardhen zyrtarisht emrat e 7 kandidatëve për president të FIFA-s

Zbardhen zyrtarisht emrat e 7 kandidatëve që do të garojnë për president të FIFA-s në Kongresin e jashtëzakonshëm që do të mbahet 26 shkurtin e ardhshëm në Cyrih të Zvicrës.

Federatat që bëjnë pjesë në qeverinë e futbollit botëror kanë propozuar emrat e kandidatëve që do të marrin pjesë në zgjedhjet presidenciale të FIFA-s dhe mes tyre figuron edhe ai presidentit aktual të UEFA-s Michel Platini.

Ky i fundit edhe pse është i pezulluar për një periudhë tre mujore nga Komisioni i Etikës në FIFA, është përfshirë në listën e kandidatëve. Por prania përfundimtare e francezit në këtë garë do të varet nga vendimi që do të marrë komiteti elektoral Ad-Hoc i FIFA. Nëse Platinisë do t’i përfundojë periudha e pezullimit përpara zgjedhjeve presidenciale atëherë gjithçka do të jetë në dorë të komitetit elektoral Ad-Hoc i cili do të vendosë nëse francezi do të jetë një prej kandidatëve.

Tashmë është zyrtare në garën për president të FIFA-s do të marrë pjesë edhe sekratari i përgjithshëm i UEFA-s italiani Gianni Infantino. Favoriti kryesor për të triumfuar në këto zgjedhje, nëse Plantini nuk do të jetë një prej kandidatëve është princi i Jordanisë Ali Bin Al Hussein. Ndërkohë 4 emrat e tjerë që do të marrin pjesë në zgjedhje janë, francezi Jerome Champagne, Musa Hasan Bility, sheiku Salman Bin Ebrahim Al Khalifa dhe Tokyo Sexwale.

http://www.rtklive.com/?id=4&r=46641