Xhirot pranë palmave bëni me vetura private!

/2L ONLINE/ – Shoqëria civile është alarmuar për keqpërdorimin e veturave zyrtare në Kamenicë dhe shpenzimet enorme të derivateve. Sipas përfaqësuesit të Organizatës “Fortesa”, Amir Jakupi, veturat zyrtare të Komunës po përdoren për qëllime private, ndaj ka kërkuar marrjen e masave, sepse është shkelje ligjore.

“Edhe në mandatin e kaluar, edhe gjatë këtij mandati, me vetura zyrtare janë bartë ushqime për kanagjeqe, veturat janë përdorur për dalje në gjueti, shoping, bartje të qengjave, kontrolla mjekësore jashtë vendit, si dhe aktivitete partiake”thotë Jakupi.

Sipas tij, veprimet e pushtetarëve aktual janë vazhdim i luksit në kurriz të qytetarëve të varfër dhe një komune mes skamjes e braktisjes.

Amir Jakupi, i cili edhe më herët kishte reaguar për keqpërdorimin e veturave zyrtare, thotë se organet komunale dështuan në shitjen e xhipit “Hyundai”, të cili po ‘i hyp e zhdryp’ kush po mundet.

“Xhipi i blerë në 2010 në vlerën e 38 mijë eurove nga ish kryetari i komunës, edhe pse ishte premtim elektoral, nuk është shitur akoma”thotë ai.

Sipas Jakupit, është për keqardhje xhiroja me xhipin e zi të Komunës pranë palmave të Durrësit nga kryesuesi i Kuvendit të Kamenicës, i cili do të duhej të ishte shembull i respektimit të ligjshmërisë dhe ruajtjes së parasë publike. /2L ONLINE/