Presidentja e Republikës së Kosovës, Atifete Jahjaga priti sot në takim futbollistin e njohur nga Kosova, dhe yllin e kombëtares së Zvicrës, Granit Xhaka, të cilit ia dorëzoi medaljen Ambasador Nderi, me të cilën e ka dekoruar më 17 Shkurt të këtij viti.
Presidentja Jahjaga e përgëzoi Granit Xhakën për punën e tij, për sukseset që ka arritur në fushën e sportit të futbollit dhe theksoi se të rinjtë nga Kosova po bëhen ambasadorë të shtetit të tyre dhe po tregojnë vlerat e tyre kudo në botë.
Futbollisti m prejardhje nga Kosova, Granit Xhaka e falënderoi Presidenten për titullin me të cilin e ka nderuar si Ambasador Nderi të Kosovës dhe tha se do të vazhdojë të kontribuojë për vendin e tij edhe në të ardhmen.
Me rastin e gjashtë vjetorit të pavarësisë së Kosovës, presidentja Atifete Jahjaga ka dekoruar me titullin “Ambasador Nderi i Kosovës”, tre lojtarët e Kombëtares zvicerane të futbollit, Granit Xhaka, Valon Behrami e Xherdan Shaqiri. Me këtë titull, Jahjaga ka nderuar edhe futbollistin e Manchesterit, Adnan Januzaj.
Titulli “Ambasador Nderi i Kosovës” epet për kontributin për interesat dhe afirmimin e Republikës së Kosovës në botë.