VV: Gjyqësia vazhdon përndjekjen politike ndaj opozitës

Sot, Lëvizja Vetëvendosje organizoi konferencë për media në të cilën folën Nënkryetarja e Kuvendit të Kosovës, Aida Dërguti dhe Drejtuesi i Grupit Parlamentar të VETËVENDOSJE!-s, Glauk Konjufca.

“Angazhimi i Qeverisë në shtypjen e zërave kundërshtues karshi marrëveshjeve të dëmshme për Republikën ka këtë bilanc: hyrja e dhunshme dhe bastisjet e shtëpive të deputetëve, me ç’rast edhe u arrestua në mënyrë të egër deputetja Donika Kadaj Bujupi, ishte fillimi i përndjekjes politike, që erdhi si pasojë e një deklarimi të Isa Mustafës dhe Hashim Thaçit menjëherë pas seancës së Kuvendit, , të cilët i cilësuan deputetët opozitarë si kriminelë dhe urdhëruan publikisht prokurorinë që të filloj përndjekjen e tyre. Si rezultat i kësaj, tashmë kemi 8 deputetë të përndjekur 3 në paraburgim me nga 30 ditë, një në paraburgim 48 orësh, 3 në arrest shtëpiak dhe një 1 me kallëzim penal. Ndërkohë që 19 aktivistë vazhdojnë të mbeten në paraburgim”, ka deklaruar nënkryetarja e Kuvendit të Kosovës, Aida Dërguti.

Ajo tha po ashtu se “nuk ka ndodhur asnjëherë që një aksion i tillë të ndërmerret në raste të korrupsionit apo edhe ndaj strukturave paralele. “

Në anën tjetër, Glauk Konjufca deklaroi që “Isa Mustafa dhe qeveria e tij, janë shndërruar në një institucion që e kontrollon drejtësinë dhe e përdor atë për përndjekjen dhe persekutimin politik të opozitës së bashkuar.”

Më pas, drejtuesi i Grupit Parlamentar të VETËVENDOSJE!-s tregoi se si përmes arrestimeve të deputetëve të opozitës po shkelet edhe ligji për imunitet të deputetëve.