Vota për kandidatët Shqiptarë në Medvegje është votë për rezistencën politike shqiptare

/ 2L ONLINE/ – Të gjithë qytetarët e Medvegjes me të drejtë vote duhet të dalin e të votojnë, me rastin e zgjedhjeve të jashtëzakonshme që do të mbahen më 13 shtatorë të këtij vit, në Medvegjë, ka thënë Kushtrim Kadriu, zëdhënës i Lëvizjes Qytetare “Vatra”.

Kadriu ka thënë se dalja e shqiptarëve në mënyre së më masovike do të krijoj një përfaqësim sa më të fuqishëm si spektër politik shqiptarë në Kosovën Lindore, edhe pse numri i votuesve në këtë komunë është simbolik, pasi që regjimi i Serbisë, në Medvegjë, ka bërë më të madhin spastrim etnik në gjithë Kosovën Lindore.

“Të gjithë banoret e dëbuar nga Medvegja duhet të dalin e të votojnë për partitë politike shqiptare, dhe të dëshmojnë se edhe Medvegja është pjese Shqiptare. Daljen sa më mosovike të shqiptarëve në këto zgjedhje konsideroj se duhet ta ndihmojnë edhe institucionet e Kosovës, duke organizuar bartjen e votuesve dhe sensibilizimin e tyre për të marrë pjesë në zgjedhjet lokale të 13 shtatorit në Medvegje”, ka thënë Kadriu.

Por, sipas tij, fatkeqësisht, mosunifikimi dhe përçarja e spektrit politik shqiptar e ka ndjekur edhe Medvegjën, duke pasur parasysh numrin e vogël të votuesve dhe numrin e madh të partive atje. Kjo ka sjellë shpërndarjen e votave në shumë parti, dhe përfaqësimin e zbehtë të shqiptarëve në Kuvendin Komunal të Medvegjës.

“Si do që të jetë, qytetarët duhet të dalin sa më masovikisht dhe duhet të votojnë për kandidatët shqiptarë pasi që, vota për kandidatet shqiptarë do të garantonte përfaqësim të denjë të shqiptarëve në Kuvendin Komunal të Medvegjës”, ka thënë Kushtrim Kadriu, zëdhënës i Lëvizjes Qytetare “Vatra”. /2L ONLINE/