“Vojçeku” vjen në Teatrin e Gjilanit këtë të mërkure!

“Vojçeku” vjen në Teatrin e Gjilanit, këtë të mërkure, 19 nëntor, ora 20:00!

Një nga veprat më të fuqishme të dramaturgjisë botërore, “Vojceku”, nën regjinë e Zana Hoxhës, vjen në Gjilan për një mbrëmje të vetme – një përballje e ndjeshme me dhimbjen njerëzore, dashurinë e thyer dhe padrejtësinë shoqërore.

“E bazuar në dramën e Georg Büchner dhe adaptimin modern të Jack Thorne, shfaqja na çon në Berlinin e vitit 1981, aty ku realiteti i ashpër i varfërisë, dhunës dhe përbuzjes i çon njerëzit drejt kufijve të çmendurisë”, thuhet në njoftimin e Teatrit të Qytetit të Gjilanit.

Në qendër të kaosit shoqëror që e rrethon, Vojçeku e mban veten gjallë vetëm me një dritë të vetme: dashurinë e tij të brishtë për Marian. Një dashuri që në pamje të parë duket e thjeshtë, njerëzore, e pafajshme — por e copëtuar ngadalë nga varfëria, presioni, turpi dhe hijet toksike të një bote që nuk lejon që ndjenjat të mbijetojnë.

Ky raport i lënduar mes dy njerëzve të dëshpëruar e shtyn shfaqjen drejt një fundi tronditës që e bën “Vojçekun” një histori universale të dashurisë që nuk arrin ta shpëtojë njeriun nga sistemi që e shtyp.

Shfaqja është produksion nga Teatri “Hadi Shehu” – Gjakovë

Luajnë:

Bujar Ahmeti • Vlora Dervishi • Edi Kastrati • Aurita Agushi • Arbies Komoni • Altina Kusari • Eden Kastrati

“Vojçeku” është për ata që kërkojnë teatër që prek shpirtin: brutal, i vërtetë, por i përshkuar nga dëshira e pashpresë për dashuri.

E mërkurë, 19 nëntor
Ora 20:00
Teatri i Gjilanit
Biletat në 045 222 525 ose drejtpërdrejt në Teatrin e Gjilanit