Vizite pune në Danimarkë

Në kuadër të implementimit të marrëveshjes ndërmjet Republikës së Kosovës dhe Mbretërisë së Danimarkës për shfrytëzimin e Qendrës së Paraburgimit në Gjilan, një delegacion i lartë i Shërbimit Korrektues të Kosovës, i kryesuar nga dy zëvendësdrejtorët e përgjithshëm, ka zhvilluar takimin e radhës me përfaqësuesit e palës daneze.

Gjatë takimit u diskutua për zbatimin e marrëveshjes nga të dyja palët, për planin e përshtatjes së objektit sipas standardeve daneze, planin e trajnimit për zyrtarët e Qendrës së Paraburgimit në Gjilan, si dhe për çështje të tjera me rëndësi.

Delegacioni gjithashtu vizitoi zyrtarët korrektues nga Qendra e Paraburgimit në Gjilan, të cilët tash e tre muaj po ndjekin trajnimin profesional në sistemin korrektues të Danimarkës.

Zyrtarët kosovarë u vlerësuan lartë për përkushtimin dhe rezultatet e arritura, si në aspektin teorik ashtu edhe në atë praktik, duke dëshmuar gatishmërinë e tyre për të sjellë përvoja dhe standarde të avancuara në sistemin korrektues të Kosovës. /2LONLINE/