Vizitë e delegacionit të UKZ-së në Universitetin “Celal Bayar” në Manisa të Turqisë
Një delegacion i Universitetit Publik “Kadri Zeka” në Gjilan ka qëndruar për një vizitë zyrtare në Universitetin “Celal Bayar” në Manisa të Turqisë. Delegacioni përbëhet nga Rektori i UKZ-së, Prof. Asoc. Dr. Artan Dërmaku, Prorektori për Bashkëpunim Ndërkombëtar dhe Projekte, Prof. Dr. Dukagjin Leka, dhe anëtarja e Këshillit Drejtues të UKZ-së, Prof. Ass. Dr. Shejnaze Gagica.
Gjatë kësaj vizite, delegacioni i UKZ-së u prit në takim zyrtar nga Rektorja e Universitetit të Manisas, ku u diskutuan mundësi të shumta për thellimin e bashkëpunimit institucional ndërmjet dy universiteteve. Në fokus të takimit ishte rritja e mobiliteteve të studentëve dhe stafit akademik e administrativ, bashkëpunimi në projekte të përbashkëta kërkimore-shkencore dhe shkëmbimi i përvojave në fushat e menaxhimit universitar, digjitalizimit dhe inovacionit.
Një nga momentet kryesore të vizitës ishte nënshkrimi i një Marrëveshjeje Bashkëpunimi ndërmjet Universitetit Publik “Kadri Zeka” dhe Universitetit “Celal Bayar”, e cila synon të formalizojë dhe forcojë lidhjet akademike dhe institucionale. Kjo marrëveshje do të shërbejë si bazë për zhvillimin e programeve të përbashkëta në të gjitha nivelet e studimeve (bachelor, master dhe doktoraturë), si dhe për realizimin e projekteve të përbashkëta me industrinë dhe përfshirjen aktive në programet evropiane si Erasmus+ CBHE, VET dhe Horizon Europe.
Me këtë rast, Rektori i UKZ-së, Prof. Asoc. Dr. Artan Dërmaku, theksoi rëndësinë e partneriteteve ndërkombëtare për ngritjen e cilësisë së arsimit dhe për krijimin e mundësive të reja për studentët dhe stafin. Ai vlerësoi mikpritjen dhe gatishmërinë e Universitetit të Manisas për bashkëpunim afatgjatë. /2LONLINE/