Vitiasi Dion Aliu merr Mirënjohje Nderi nga Olimpiada e 63-të Matematike Ndërkombëtare – IMO 2022

Në kuadër të Olimpiadës së 63-të Matematike Ndërkombëtare – IMO 2022, që u mbajt në Oslo të Norvegjisë, ekipi i Kosovës ka fituar katër Mirënjohje Nderi, ku nga këta katër nxënës me më së shumti pikë (16), u vlerësua i riu vitias Dion Aliu.

Me këtë rast, kryetari i komunës së Vitisë, Sokol Haliti, e ka përgëzuar nxënësin Dion Aliu, për këtë sukses kaq të madh që e ka arritur në këtë olimpiadë.

“Është nderë dhe privilegj i jashtëzakonshëm për mua si kryetarë dhe për të gjithë qytetarët e Vitisë, të kem të rinjë kaq të talentuar, si nxënësi Dion Aliu, që me punën e tij ka përfaqësuar jo vetëm komunën e Vitisë, por shtetin e Kosovës, në këtë garë me renome ndërkombëtare, siç është Olimpiada Matematike Ndërkombëtare. Andaj në emër timin dhe të gjithë qytetarëve e uroj Dionin për suksesin e arritur, dhe e inkurajoj që të na përfaqësoj edhe më denjësisht në garat e ardhshme”, u shpreh Haliti.

Edhe Shoqata e Matematikanëve të Kosovës e ka përgëzuar Ekipin e Kosovës për përfaqësim të denjë të shtetit të Kosovës në këtë olimpiadë. Përndryshe në këtë olimpiadë, mirënjohje kan fituar nxënësit: Dion Aliu (16 pikë), Viol Guda (12 pikë), Lum Jerliu (9 pikë) dhe Yllkë Jashari (8 pikë). /2LONLINE/