Vitia përmbyll dëgjimet buxhetore për vitin 2027

Komuna e Vitisë ka përmbyllur ciklin e dëgjimeve publike për planifikimin e buxhetit komunal për vitin 2027, me debatin e fundit të zhvilluar me qytetarët e Vitisë.

Në këtë takim, qytetarët patën mundësi të paraqesin kërkesat, shqetësimet dhe prioritetet e tyre për investimet që synohet të përfshihen në buxhetin e vitit të ardhshëm.

Megjithatë, në këtë takim pjesëmarrja e qytetarëve nuk ishte e kënaqshme. Organizatorët e kanë vlerësuar këtë si shqetësim, duke pasur parasysh rëndësinë që kanë dëgjimet publike në përcaktimin e projekteve dhe prioriteteve që ndikojnë drejtpërdrejt në jetën e qytetarëve.

Nga diskutimet e zhvilluara dolën disa kërkesa konkrete. Qytetarët kërkuan asfaltimin e dy rrugicave në rrugën “Ylvi Demiri”, ndërsa një kërkesë tjetër ishte hapja dhe rregullimi i një rruge qarkore, e cila do të mundësonte shmangien e kolonave dhe lehtësimin e qarkullimit në qytet.

Në takim u kërkua gjithashtu që të punohet më shumë në rritjen e sigurisë në shkolla, ndërsa një tjetër kërkesë ishte ndërtimi i një rruge bujqësore në fshatin Smirë.

Me këtë takim është përmbyllur cikli i dëgjimeve buxhetore të Komunës së Vitisë për vitin 2027, gjatë të cilit qytetarët, grupet e ndryshme të interesit dhe komunitetet kanë pasur mundësi të paraqesin kërkesat e tyre për planifikimin e buxhetit të vitit të ardhshëm. /2LONLINE/