Vitia e vendosur të plotësojë obligimet që dalin nga Plani Kombëtar i MSA-së

/2L ONLINE/ – Në organizimin e Zyrës Komunale për Integrim Evropiane sot është mbajtur një takim pune në mes të drejtorive dhe zyrave komunale dhe të tjerë me qëllim të shqyrtimit të planit kombëtar për MSA-në, obligimet që dalin komunës nga agjendat evropiane për këtë vit. Po ashtu është folur edhe për vazhdimin e zbatimit të obligimeve që ka ndalur nga plani i MSA-së të vitit 2015.
Ky takim është mbajtur nën kryesimin e zv. kryetarit të Komunës së Vitisë, Hasan Aliu i cili ka kërkuar nga të pranishmit që punojnë bashkërisht me Zyrën Komunale për Integrim Evropiane me qëllim që të përmbushin obligimet e mbetura dhe ato që dalin për këtë vit. Ndërkaq Florent Ymeri, nga ZKIE dhe Përparim Sadiku ish ushtrues detyre në këtë zyre kanë folur për rëndësinë e zbatimit të obligimeve por edhe rreth formularëve që duhet të plotësohen nga mekanizmat përkatëse. Gjatë këtij takimi pjesëmarrësit kanë dhënë komentet e tyre pikërisht rreth formularit që duhet të plotësohet nga organet përgjegjëse. /2L ONLINE/