Vitia dhe Ministria e Infrastrukturës nënshkruan Memorandumin për financimin e projekteve infrastrukturore

/2L ONLINE/ – Kryetari i Komunës së Vitisë, Sokol Haliti është pritur dje në takim nga Ministri i Infrastrukturës, z. Lutfi Zharku. Me këtë rast ata nënshkruan një memorandum mirëkuptimi për financimin e projekteve infrastrukturore në Komunën e Vitisë.
Ky memorandum ka për qëllim financimin e asfaltimit të rrugës në fshatin Devajë dhe Radivojcë, asfaltimin e rrugës në fshatin Terpezë dhe Ballancë, si dhe asfaltimin e rrugës në fshatin Remnik – Nasalë (Viti – Gjilan). Ministria e Infrastrukturës i financon këto projekte në shumën e tërësishme prej 397.000 eurosh, kurse procedurat e realizimit të këtyre projekteve do të zhvillohen nga ana e komunës së Vitisë.

Gjatë takimit ministri Zharku shprehu përkushtimin e tij edhe për përkrahjen me bashkëfinancim vazhdimin e rrugës Komogllavë – Tërstenik deri në Sllatinë, rrugën Viti – Kërbliq, disa lagje në zonat rurale dhe urën në qytetin e Vitisë. Kryetari Haliti falënderoj Ministrin Zharku për këtë bashkëpunim duke theksuar se realizimi i këtyre projekteve është në interes jo vetëm të qytetarëve vitias por edhe të komunave për rreth. /2L ONLINE/