Violant Sylejmani shpallet sportist i vitit në Gjilan

/2L ONLINE/ – Pikërisht në ditën e çlirimit, Komuna e Gjilanit, përkatësisht Njësia për Sport ka ndarë sot mirënjohje për më të dalluarit e vitit 2015/2016 në sektorin e sportit, ngjarje kjo në të cilën ka marrë pjesë kreu i Gjilanit, Lutfi Haziri me bashkëpunëtorë, “Nderi i Qytetit”, boksieri Erzen Rrustemi, deputetë e asambleistë, sikurse edhe sportdashës të shumtë.

Mirënjohjet e sotme për më të dalluarit e vitit në sport po jepen për herë të parë më 15 qershor dhe kryetari Haziri tha se kalendari i vitit për shpalljen e më të dalluarve duhet të lidhet me Ditën e Çlirimit.

“Sot, festën e qytetit e shënuam edhe shpalljen e më të dalluarve në sport për vitin 2015/2016. Sot ne kemi emra të njohur të sportit në botë, e që janë emblematik të Gjilanit, siç është Xherdan Shaqiri e Erzen Rrustemi. Por, këta dhe të tjerët, nuk kanë mundur të arrijnë suksese po të mos i kishim legjendat gjilanase që dhanë shumë për sport. Pra, gjenerata të tëra kanë punuar dhe janë angazhuar që ne sot t’i korrim sukseset kombëtare e ndërkombëtare. Jam krenar që pothuajse të gjitha kategoritë e sportit në Gjilan po sjellin rezultate të mahnitshme kudo që po marrin pjesë. Gëzuar dita e çlirimit dhe faleminderit për nderin që po ia bëni Gjilanit. Urime sportist”, ka thënë Haziri, në adresimin para qindra sportistëve.

Me vendim të jurisë profesionale, sportiest i vitit është zgjedhur boksieri Violant Sylejmani, i cili fitoi tri medalje të arta, edhe atë në turneun ndërkombëtar në Bosnie Hercegovina, në turneun “Gongu i Artë” në Maqedoni dhe në turneun “Adem Jashari” të mbajtur në Republikën e Kosovës.

Me mirënjohje janë shpërblyer edhe këta sportistë: Ira Salihu (KV “Drita”), Alban Tosumi (KF “Gjilani”), Blerta Shala (KF “Intelektualet”), Bjondina Ramabaja (KH “Drita”), Elhami Shabani (Klubi Karatesë “Drita”), Blinera Jaha (KV “Drita”), Alban Haziri (KH “Zhegra”), e Mirlinda Daku (KB “Drita”).

Klubi më i dalluar është shpallur ai i volejbollit “Drita”, trajneri më i dalluar Lorik Ilazi, derisa Selami Haziri – pedagogu sportiv i vitit.

Ndërkaq, te Shpresat e Sportit për vitin 2015/2016 u nderuan me mirënjohje: Belinë Rashiti (Klubi i Karatesë “As”), Blerand Limoni (Klubi i Karatesë “Dardania”), Erdonis Maliqi (Klubi i Boksit “Drita”), Ardit Mustafa (Shkolla e Fubollit “Shkëndija”) dhe Vesa Ibrahimi (Klubi i Karatesë “Drita”).

Mirënjohje e veçantë i është ndar Avdil Ibishit (Handikos), ndërsa me mirënjohje post mortum janë nderuar, Ramadani Salihu – ish futbollist dhe Servet Shala ish-volejbollist.​ /2L ONLINE/