Vetëvendosje: Vdekja e punëtorëve në Kazakistan rëndon mbi të gjithë ata që e kanë varfëruar Kosovën

Sot ka ndërruar jetë edhe qytetari i katërt nga Kosova që po punonte në Astana të Kazakistanit. Lëvizja VETËVENDOSJE! u shpreh ngushëllime familjeve, dhe shpreh shqetësimin e saj për humbjen e jetës së qytetarëve që janë të detyruar të mërgojnë për të siguruar ekzistencën.

Kosova është nga vendet e rralla në botë që e sheh të zbatuar aq pastër skllavërinë neoliberale. Në Kosovë eksportohen njerëzit, importohen produktet, për t’u eksportuar edhe paratë pastaj. Gjuha e ftohtë e ekspertëve na thotë se këto janë kushtet e tregut, ata bile ishin të lirë të zgjidhnin nesë duan të shkojnë ose jo. Por, ja që “kushtet e tregut” janë kushtëzuar nga faktorë konkret subjektivë ku mund të ndikojmë, dhe jo nga natyra objektive e gjërave, apo fuqitë mbinatyrore mbi të cilat s’mundemi as të gjykojmë.

Konkretisht, Kosova është bërë treg i fuqisë së lirë punëtore, por edhe pre e biznesmenëve matrapazë sepse ajo lëngon nga papunësia, varfëria e moszhvillimi. E të gjitha këto vijnë nga politikat e zbatuara ekonomike tash e 16 vjet; politika që shkatërruan potencialin prodhues, i lanë njerëzit buzë ekzistencës dhe shkatërruan shoqërinë; nga politikanë si Isa Mustafa e Hashim Thaçi që premtojnë qindramijëra vende pune, e kur fillojnë qaverisjen, s’bëjnë tjetër veç zgjerimit të klientelës, zhvatjes së buxhetit e koncesione Serbisë.

Ky rast tragjik është thirrje që na fton për angazhim e na thërret në përgjegjësi për ta ndërtuar perspektivën këtu, dhe jo të krenohemi me projektet që degdisin qytetarët jashtë vendit, siç bën Qeveria.