Vetëvendosje, takim me studentët e Universitetit të Amsterdamit

Lëvizja Vetëvendosje takoi një grup studentësh ndërkombëtarë në degën Politikë dhe Marrëdhënie Ndërkombëtare pranë Universitetit të Amsterdamit, të cilët po zhvillojnë një vizitë studimore në Kosovë. Studentët bashkë me profesorin e tyre u pritën nga Kryetari Albin Kurti dhe drejtuesi i Sekretaritatit për Marrëdhënie me Jashtë, Boiken Abazi.

Kurti njoftoi studentët mbi angazhimin e Lëvizjes, duke prezantuar shtyllat programore socialdemokrate të Lëvizjes, dhe punën nëpërmjet Kuvendit, tubimeve e protestave. Këtu u shpjegua edhe domosdoshmëria e aksionit të drejtpërdrejt qytetar në rrethanat e një shteti të kapur dhe autoritar.

Studentët po ashtu diskutuan rreth integrimit të Kosovës në BE, duke u ndalur edhe në rrezikun që përbën rritja e ekstremit të djathtë në Evropë për vetë shtetet e BE-së dhe ato të Ballkanit. Në diskutim u kuptua se shumë prej autorëve dhe teoricienëve mbi të cilët mbështeten linjat politike të Lëvizjes ishin edhe pjesë kryesore e kurrikulave të studentëve.

Universiteti i Amsterdamit do ta vizitojë Lëvizjen sërish vitin e ardhshëm, duke e integruar në planin mësimor të kësaj dege edhe vizitën në Lëvizje. Me këtë rast kryetari Kurti i nxiti studentët që punimet e tyre kërkimore t’i zhvillojnë për Kosovën, thuhet në komunikatën e Vetëvendosjes.