Vetëvendosje: Raporti i Progresit – vazhdim i ngecjeve dhe i dështimit

Raporti i Progresit 2014 përmban kritika të shumta për Kosovën. Mirëpo, Kryeministrit në ikje, Raporti i Progresit iu duk pozitiv. Sipas tij, Kosova edhe këtë vit gjendet “para një fillimi të ri…një epoke të re…një epoke të integrimit evropian”, porse nuk e sqaroi se çfarë do të duhej të ishte ky fillim i ri, thuhet në një komunikatë të Vetëvendosjes.

Padyshim që nevojitet një fillimin i ri, por ai do të ndodhte nëse Hashim Thaçi mos të shtrembëronte përsëri realitetin por të pranonte ngecjet dhe dështimet e Qeverisë së tij duke i hapur rrugë edhe largimit nga ai post. Pra, fillim i ri do të ishte kur ai do t’i tregonte qytetarëve se Raporti i Progresit, në vend se të tregonte “progres të theksuar” në krahasim me vitin e kaluar, nuk paraqet pothuajse asnjë hap pozitiv përveç dështimeve dhe stagnimeve të njëpasnjëshme.

Njëjtë si në vitin 2013, Raporti i Progresit fokusohet në normalizimin e raporteve mes Kosovës dhe Serbisë. Por, ndryshe, këtë vit thuhet se marrëveshjet e arritura në dialog kanë shënuar shumë pak progres dhe në disa raste procesi edhe ka stagnuar duke mos potencuar asnjëherë arsyen apo shkakun e stagnimit. Në raportin e vitit 2013 thuhet se dialogu Kosovë-Serbi i ka hapur rrugën Kosovës për pjesëmarrje dhe përfaqësim në organizatat dhe forumet rajonale, ndërsa, në raportin e vitit 2014 del se marrëveshja për përfaqësim dhe pjesëmarrje të Kosovës në organizata dhe forume, siç janë pajtuar palët në dialog, nuk ka pasur efektin e dëshiruar. Kësisoj, implementimi i marrëveshjes për përfaqësimin e Kosovës në forume rajonale vazhdon të jetë problematik.

Strategjia antikorrupsion, e cila në vitin 2013 u konsiderua si hap i rëndësishëm për ta luftuar korrupsionin, në raportin e viti 2014 thuhet se ka dështuar në arritjen e rezultateve konkrete për shkak të mbështetjes së dobët politike dhe se luftimi i korrupsionit duhet të mbështetet fuqimisht nga vullneti politik i cili gjithmonë ka munguar. Çështje tjetër e cila vazhdon të mbetet tejet shqetësuese është edhe ndërhyrja politike në gjyqësor duke cenuar pavarësinë e sistemit gjyqësor.

Në raport me një gjuhë të përzgjedhur diplomatike thuhet se përmes një procesi të drejtë dhe të papolitizuar duhet të zgjidhet Avokati i ri i popullit, në mënyrë që të sigurohet pavarësia e institucionit dhe mbrojtja e të drejtave të qytetarëve të Kosovës.

Edhe pse çdo vit radhazi është premtuar se rekomandimet e raporteve të progresit do të adresohen, në raportet e progresit çdo vit vijnë rekomandime pothuajse të njëjta. Edhe këtë vit, shqetësuese mbeten kërcënimet dhe sulmet ndaj gazetarëve nga policia dhe zyrtarët publik, ndërhyrja politike në media, shkelja e të drejtave të punëtorëve dhe rreziku i lartë në vendin e punës (vetëm gjatë vitit 2013 kanë ndodhur 54 aksidente dhe 17 aksidente me fatalitet), numri i vogël i inspektorëve të punës, ndërhyrja politike në administratën publike, papunësia e lartë, dhe numri i lartë i azilkërkuesve nga Kosova për në shtetet evropiane për shkak të gjendjes së rëndë ekonomike në vend. Kështu, duke krahasuar rekomandimet e raporteve të kaluara me raportin e këtij viti, kuptojmë se Kosovës në të vërtetë i duhet një fillim i ri, një politikë e re dhe padyshim një Qeveri e re, thuhet në fund të komunikatës së Lëvizjes Vetëvendosje.