Vetëvendosje në Gjilan vatër e përhershme e aktivizmit

(2L ONLINE) – (me rastin e nëntë vjetorit të themelimit të Lëvizjes vetëvendosje në Gjilan) – Faza e parë e Lëvizjes ka qenë themelimi I subjektit, krijimi I fushatës, lindja e organizatës. Kjo është faza e të qenit dhe e të konceptuarit. Thirrja e Lëvizjes në atë kohë ka qenë: ne jemi këtu dhe duam këtë. Ne jemi Lëvizje dhe duam Vetëvendosje. Ne jemi Lëvizja VETËVENDOSJE!

Nga: Luan ALIU

Lëvizja VETËVENDOSJE! në Gjilan është themeluar më 20 gusht të vitit 2005. Vullneti dhe gatishmëria e të rinjve për angazhim, bashkë me kontekstin politik të kohës kanë ndikuar që Qendra e Lëvizjes VETËVENDOSJE! në Gjilan të jetë përherë vatër e aktivizmit.

Siç ka ndodhur me Lëvizjen në përgjithësi edhe VETËVENDOSJE! në Gjilan është themeluar në aksion dhe është rritur e zhvilluar përmes aksionit. Ka qenë protesta e datës 21 gusht në Qendër të Gjilanit që i ka dhënë udhë Lëvizjes në Gjilan. Atëbotë po bëhej gjithnjë e më e qartë se përcaktimi i statusit të Kosovës nuk do të bëhej përmes parimit të vetëvendosjes së popujve, por përmes negociatave me Serbinë, me ç’rast Serbia do të bëhej pjesë e vendimmarrjes për rregullimin e brendshëm territorial të Kosovës.

Nga këto bisedime të dëmshme për Kosovën, ishte shënjuar të dëmtohej veçanërisht Gjilani që po i merrej territori, e qytetarëve të tij që po u largoheshin shërbimet. Është fjala për decentralizmin etnik që po u imponohej qytetarëve. Edhe aksionet tona kishin në thumb të kritikës e kundërshtimit pikërisht këto çështje. Kujtojmë këtu parullën JO NEGOCIATA-VETËVENDOSJE! të shkruar në çdo hapësirë publike; kujtojmë protestat, aksionet, peticionet e qindra tubime me qytetarë në kundërshtim të decentralizimit.

Pas vendimit që në shërbim dhe funksion të realizimit të vetëvendosjes, përveç protestave, aksioneve e aktiviteteve të tjera joinstitucionale, ta shtojmë edhe pjesëmarrjen në zgjedhje e institucione, VETËVENDOSJE! në Gjilan ka rritur kapacitetet e saja kadrovike me profesionistë të ndryshëm që japin kontributet e tyre në Komitetet e VETËVENDOSJE!-s.

Me kalimin e kohës, Lëvizja është zhvilluar edhe sa i përket çështjeve e temave që adresojmë e për të cilat angazhohemi. Përveç angazhimit tonë në shërbim të realizimit të Programit Politik të Lëvizjes VETËVENDOSJE! të nivelit qendror, Qendra e Gjilanit trajton çështje e përgatit politika edhe për nivelin lokal. Vlen të përmendet këtu puna e jashtëzakonshme monitoruese dhe kritikat e propozimet e asamblistëve të Lëvizjes VETËVENDOSJE! në Kuvendin Komunal të Gjilanit.

Pra, ne jemi zhvilluar. Dhe ne duhet te jemi gati për të gjitha. /2L ONLINE/