Vetëvendosje: Mikëpritje e solidaritet për emigrantët

Jemi dëshmitarë se pas Pranverës Arabe, konfliktit të përgjakshëm në Siri, fushatës çnjerëzore të Shtetit Islamik, dhe mjerimit social të vendeve të pazhvilluara afrikane, këto dy vitet e fundit në veçanti, mund të karakterizohen si vite të masivizimit të refugjatëve dhe migrantëve në drejtim të Evropës. Këtij numri të madh të migrantëve dhe refugjatëve i shtohet edhe një numër i konsiderueshëm i migrantëve dhe refugjatëve nga shtetet ballkanike, sidomos Kosova, Shqipëria, Bosnja e Hercegovina, Maqedonia e Serbia. Të gjithë këta janë të shtrënguar nga rrethanat dhe shtypjet e caktuara politike, sociale e ekonomike që t’i lëshojnë vendet e tyre, në përpjekje për ta gjetur një jetë më të mirë nëpër vendet e zhvilluara të Perëndimit.

Kështu thuhet në një komunikatë të Lëvizjes Vetëvendosje, ku më tutje theksohet se ikja masive e miliona njerëzve nga vendet e tyre, luftërat, rritja e formave të ndryshme të fashizmit e ksenofobisë paraqesin fytyrën e vërtetë të asaj që ne rëndom e quajmë globalizim, por që në fakt është neoliberalizmi i globalizuar.

Por ajo që kemi parë sidomos nëpër shtetet ku ata kalojnë për të mbërritur aty ku dëshirojnë, është një qasje përgjithësisht jomikpritëse dhe ksenofobe nga ana e autoriteteve të shteteve përkatëse, të cilat mbase edhe po tolerojnë dhe po bashkëpunojnë me trafikantët dhe përfituesit e ndryshëm të kësaj tragjedie, në vend se t’i ndëshkojë ata.

Duke filluar nga Greqia, përmes Maqedonisë e deri te Hungaria, migrantët dhe refugjatët përjetojnë mungesën elementare të trajtimit të dinjitetshëm dhe të garantuar me konventa ndërkombëtare. Madje shteti i Sllovakisë, i cili është pjesë e BE-së, mbajti qëndrim edhe më racist, duke ua mohuar mundësinë e strehimit refugjatëve dhe migrantëve në baza të përkatësisë fetare. Të drejtat e tyre shkelen shpesh dhe ata ushqehen e strehohen keq. Për me keq, ndonjëherë ndodh që të përjetojnë edhe dhunë, siç ishte rasti i turpshëm i rrahjes së refugjatëve nga policia në kampet e Maqedonisë, apo edhe dhunën e vazhdueshme të padukshme strukturore të përdorimit të tyre si mall tregtie, në emër të ilegalitetit të tyre.

Neve na duhet një Evropë e ndërtuar mbi vlerat e solidaritetit, humanizmit dhe ndihmës për të tjerët që janë në hall e në nevojë. Trajtimi njerëzor i refugjatëve dhe migrantëve është parakusht i një shoqërie të drejtë dhe i një shteti demokratik, thuhet në fund të komunikatës të Lëvizjes Vetëvendosjes.