Strukturat serbe në Kosovë po vazhdojnë t’i injorojnë jo vetëm institucionet vendore por edhe ato ndërkombëtare. Rezistenca e tyre për t’u integruar në jetën shoqërore dhe politike në Kosovë po vazhdon tash e 15 vjet pas luftës, ndonëse nuk kanë munguar përpjekjet si nga ana e vendorëve ashtu edhe ndërkombëtare për t’i bërë banorët e kësaj ane të ndihen qytetarë të barabartë me pjesën tjetër të vendit, vlerësojnë analistët politikë.
Sipas Imer Mushkolajt, qasja që tash kanë serbët e kësaj ane ndaj institucioneve ndërkombëtare e me theks të veçantë ndaj EULEX-it është taktik që po e përdor minoriteti serb në veri të vendit, shkruan Tribuna.
“Kjo është një strategji e tyre pasi që po shfrytëzojnë zbrazëtinë institucionale, në mënyrë që ta krijojnë një situatë artificiale atje në kuptimin e sigurisë”, ka thënë Mushkolaj.
Sipas tij, serbët janë në kërkim të një pozicioni më të favorshëm në skenën politike në vend, në kohën kur ata pritet edhe njëherë të jenë faktorë i rëndësishëm për zhvillimet e mëtejme.