Vazhdon nderimi i dëshmorëve dhe heronjve përmes “Flakës së Janarit…”

(2L ONLINE) – “Në prag të fillimit të manifestimit kulturor mbarëkombëtar “Flaka e Janarit 2015”, që mbahet për herë të 24-të në nderim të heronjve, dëshmorëve dhe martirëve të historisë shqiptare, të rënë përgjatë rrugëtimit të gjatë për liri e mëvetësi kombëtare, kreu i komunës së Gjilanit Lutfi Haziri ka shkruar në llogarinë e tij zyrtare në Facebook, se dëshmorët dhe heronjtë e kombit na dhanë guximin e kurajën që të mos pajtohemi me të keqen dhe padrejtësitë, por të vazhdojmë rrugën tonë për liri.

Ja postimi i plotë i Hazirit:

“Në prag të fillimit të manifestimit kulturor mbarëkombëtar “Flaka e Janarit 2015”, që mbahet për herë të 24-të në nderim të heronjve, dëshmorëve dhe martirëve të historisë shqiptare, të rënë përgjatë rrugëtimit të gjatë për liri e mëvetësi kombëtare, i kujtoj dhe përulem për sakrificën e mbi 8000 viktimave të masakrës së Gjilanit dhe për kolosët e kombit: Idriz Seferi, Mulla Idriz Gjilani, Esat Berisha, Halim Orana, Zenel Hajdini, Musa Zajmi, pastaj Shefki Desivojca e Bejtë Pireva që janë sinonim i besimit në Zot e Atdhe. Më lejoni të kujtoj, po ashtu, stërgjyshin tim Rrustem (Mustafë) Hazirin i cili për shkak të kryengritjes më 1912 u burgos në Jemen duke mbajtur tetë vite burg dhe gjyshin tim Hetem (Rrustem) Hazirin, i cili ishte komandant në hekurudhë dhe u vra në mbrojtje të kufirit shqiptar, në thirrje të kryengritjes dhe rezistencës. Me këtë rast, në 31-vjetorin e rënies së dëshmorëve të kombit, Rexhep Mala e Nuhi Berisha, i kujtoj me respekt maksimal për veprat dhe sakrificën e tyre në shërbim të atdheut, sikurse edhe dëshmorët Kadri Zeka e Zija Shemsiu. Në prag të nisjes së “Flakës së Janarit”, shpreh vlerësimet dhe gjunjëzohem për kontributin e jashtëzakonshëm të Agim Ramadanit, i cili ishte emblemë e luftës për liri. “Flaka e Janarit” shënon edhe vdekjen e Presidentit historik Dr. Ibrahim Rugova dhe të heroit tonë kombëtar Gjergj Kastrioti Skënderbeu. Dëshmorët dhe heronjtë e kombit na dhanë guximin e kurajën që të mos pajtohemi me të keqen dhe padrejtësitë, por të vazhdojmë rrugën tonë për liri. Lavdi e përjetshme jetës dhe veprës së tyre! LH