Njëri nga spekuluesit e radhës kundër presidentit të ndjerë. Ibrahim Rugova, mbrëmë në emisionin “Pa Rrottlla” na u paraqit edhe Sadri Ramabaja, i cili hodhi në opinion një spekulim të ri dhe krejtësisht të fabrikuar me qëllim për ta dezinformuar opinionin e gjerë shqiptar, shumica absolute e të cilit për 25 vite rresht e ka përkrahur dhe vazhdon ta mbështetë filozofinë politike dhe kombëtare të presidentit tonë historik.
Në cilësinë e bashkëpunëtorit, por edhe të bashkorganizuesit të ardhjes së presidentit Ibrahim Rugova nga Italia në Gjermani si dhe vizitave të tjera në shtetet perëndimore, distancohem dhe e hedh poshtë spekulimin e Sadri Rmabajës si dhe shpifjet e gjithë atyre të cilët vazhdojnë me luftën speciale kundër presidentit Rugova edhe për së vdekuri të tij.
Po ashtu, është shpifje e kulluar spekulimi i tij imagjinar, se gjoja Perëndimi në aeroportin e Romës e paskësh marrë peng presidentin Rugova që mos të deklarohet kundër UÇK-së, ngase unë kam qenë bashkë organizues me ndërkombëtarët për ardhjen e tij në Gjermani, por edhe si dhe shoqërues i presidentit, asnjëherë dhe në asnjë rrethanë ai nuk është trajtuar si “peng” nga perëndimorët siç spekulon S. Ramabaja, i cili në emisionin e gazetarit të RTK-së, Milaim Zekës, tha se “Rugova në aeroportin e Romës ishte marrë peng nga perëndimorët për të mos u deklarue kundër UÇK-së në Romë..!, një gënjeshtër kjo ogurzezë dhe e pa kapshme për një njeri që ligjëron në Universitet..!?
Shtrohet pyetja, nëse ky “profesor” manipulon opinionin duke i ofruar fakte të rreme për presidentin e parë të Kosovës së lirë, Ibrahim Rugovën, si mund t’i besojnë studentët ligjëratave të tij, kur i njëjti shpif me kaq paturpësi dhe urrejtje kundër liderit nacional dhe figurës më emblematike të shqiptarëve në tri dekadat e fundit?!
Unë kam qenë në Romë si dhe në konferencën e parë për medie pas lirimit nga pengmarrja e Rugovës, nga regjimi i Millosheviqit dhe më pas jam marrë edhe me përgatitjen e ardhjes së tij në Bonn. Andaj, kërkoj nga S. Ramabaja që të kërkojë falje publike për spekulimin e tij që e bëri mbrëmë në mediumin publik të Kosovës..!
Dr. Ibrahim Rugova, në konferencën për shtyp në Romë ka kërkuar me ngulm intervenimin tokësor të NATO-s për shpëtimin dhe mbrojtjen e asaj pjese të popullatës shqiptare që kishin mbetur brenda në Kosovë.
Ndërsa, për deklaratat e tij rreth LDK-së dhe rolit të saj historik nuk ka nevojë të thuhet këtu më shumë, sepse ato janë të njohura për opinionin./2LONLINE/
Shkruan: Hafiz Gagica