Ushtrimet fizike nuk janë çelësi kundër obezitetit

Aktiviteti fizik nuk luan rol të rëndësishëm në luftën ndaj obezitetit. Kështu thuhet në një shkrim të BBC, më të lexuarin e ditës. Mjekët thonë se në fakt të gjitha mesazhet publike duhen fokusuar tek ushqimet e pashëndetshme.

Në një editorial në British Journal of Sports Medicine, tre ekspertë ndërkombëtarë thonë se është koha që të shpërbëjmë mitin e ushtrimeve fizike. Ata shkruajnë se aktiviteti është i rëndësishëm për disa sëmundje si diabeti, sëmundjet e zemrës dhe demenca, por ndikimi tek obeziteti është minimal.

Në vend të kësaj, teprimi me sheqerin dhe karbohidratet është problemi kryesor. Ekspertët madje fajësojnë industrinë e ushqimit se po inkurajon besimin se ushtrimet mund të ndikojnë për të ulur problemet e shkaktuara nga ushqimi i pashëndetshëm.