UNHCR pasuron Bibliotekën e UKZ-së përmes një donacioni me literaturë

Biblioteka e Universitetit Publik “Kadri Zeka” në Gjilan është pasuruar me një donacion të rëndësishëm të literaturës, kryesisht në lëminë e Juridikut, e që janë në gjuhën angleze me përmbajtje mbi Azilin, Refugjatët dhe Pashtetësinë. Ky donacion, i ofruar nga Zyra e Shefit të Misionit të UNHCR-së në Prishtinë, do të ndihmojë studentët e Fakultetit Juridik dhe stafin të kenë qasje në burime të vlefshme për të thelluar njohuritë e tyre mbi Mbrojtjen Ndërkombëtare dhe mandatin e UNHCR-së.

Kjo mbështetje është bërë e mundur përmes UNHCR-së me financimin e Programit Rajonal IPA III të Komisionit Evropian: “EU Regional Support to Protection-Sensitive Migration Management Systems in the Western Balkans”. Ky program synon forcimin e menaxhimit të migracionit në rajonin e Ballkanit Perëndimor, duke siguruar qasje në literaturë të specializuar dhe informacion të përditësuar mbi të drejtat e refugjatëve dhe çështjet e azilit.

Me këtë rast, Prorektori për Bashkëpunim Ndërkombëtar dhe Projekte, Prof. Dr. Dukagjin Leka, i cili së bashku me ekipin e tij ka pritur në takim Z. Arjun Shrestha, Shef i Misionit të UNHCR-së në Kosovë, dhe përfaqësues të Misionit të UNHCR-së në Prishtinë, ka vlerësuar donacion si një hap të rëndësishëm drejt pasurimit të bibliotekës universitare dhe forcimit të kapaciteteve akademike në fushën e të drejtës ndërkombëtare dhe të drejtave të refugjatëve.

Ndërkohë gjatë takimit, u diskutua për mundësitë e zgjerimit të bashkëpunimit në të ardhmen për të mbështetur edhe më tej studentët dhe stafin akademik të UKZ-së.

Donacioni i UNHCR-së vjen në një kohë kur Universiteti Publik “Kadri Zeka” po zgjerohet vazhdimisht në aspektin akademik, duke u përpjekur të ofrojë qasje në literatura bashkëkohore dhe të përditësuara me zhvillimet më të fundit shkencore dhe profesionale. /2LONLINE/