UNESCO përfshin Kosovën në rend të ditës

Këshilli Ekzekutiv i UNESCO-s, e ka përfshirë në rend të ditës propozimin për anëtarësimin e Kosovës në këtë organizatë. Në debatin pas miratimit të rendit të ditës, pakënaqësitë për vendimin e përfshirjes së anëtarësimit të Kosovës në agjendë i kanë shprehur vetëm përfaqësuesit e Rusisë, Kinës, Kubës dhe Argjentinës, transmeton rtklive.com.

Për propozimin e anëtarësimit të Kosovës pritet të debatohet dhe votohet më 20 tetor para përfundimit të mbledhjes së Komitetit Ekzekutiv të UNESCO-s, e cila do të zgjasë deri më 22 tetor. Vendimi merret me shumicë votash, kurse nëse propozimi pranohet, atëherë vendimin përfundimtar për anëtarësimin e Kosovës do ta marrë Konferenca e Përgjithshme e UNESCO-s, e cila mbahet prej 3 deri më 18 nëntor. Në Konferencën e Përgjithshme marrin pjesë 195 anëtarët e UNESCO-s dhe secili vend ka një votë. Për anëtarësimin e Kosovës janë të nevojshme dy të tretat.

Kërkesën për pranim të Kosovës në UNESCO formalisht e ka parashtruar Shqipëria, ndërsa është përkrahur nga 45 vende, ndër to SHBA, Gjermania, Britania, Franca, Austria, Sllovenia, Irlanda, Holanda, Luksemburgu, Danimarka, Finlanda, Suedia, Turqia si dhe Estonia, Letonia e Lituania. Po ashtu është mbështetur edhe nga Emiratet e Bashkuara Arabe, Arabia Saudite, Katari, Kuvajti, Bahreini, Belizi, Burkino Faso, Çadi, Kostarika, Bregu i Fildisht, Republika Domenikane, Salvadori, Gaboni, Gambia, Gana, Grenada, Guineja, Haiti, Hiondurasi, Jordania, Lesoto, Omani, Panama, Papua Guineja e Re, Senegali, Somalia , Sudani Jugor, Togo, Tanzania dhe Vanuatu.