UEFA e fut Genc Nuzën në listën e gjyqtarëve premtues për 2023/24

Futbolli kosovar shënon një tjetër arritje në sektorin e ndarjes së drejtësisë. Është gjyqtari Genc Nuza, i cili është përfshirë nga UEFA në programin “Mentor&Talent” për edicionin 2023/2024, njofton faqja zyrtare e FFK-së.

Njëri nga gjyqtarët më të dalluar në vitet e fundit në Kosovë, i cili me sukses ka ndarë drejtësinë edhe në ndeshjet ndërkombëtare, ka hyrë në programin e 20 gjyqtarëve më premtues të UEFA-së. Ai do ta ketë mentor ish-gjyqtarin e njohur të FIFA-s, belgun Frank De Bleeckere.

Ky program do të fillojë më 29 gusht. Nuza është shprehur i nderuar për përfshirjen në këtë program, e veçmas për faktin se për mentor do ta ketë një ish-gjyqtar me renome botërore.

“Jam tejet i lumtur që jam i zgjedhur nga UEFA si gjyqtar premtues për të ardhmen dhe që do ta kem një mentor siç është Franck De Bleeckere, i cili ka qenë gjyqtar në Kampionate botërore e evropiane. Shpresoj ta ngrisë nivelin e referimit tim edhe më shumë gjatë këtij programi me ndihmën e mentorit tim”, theksoi Genc Nuza, i cili ndodhet në Maltë, ku po ndan drejtësinë në Kampionatin Evropian për grupmoshën U19, njofton faqja zyrtare e FFK-së. /2LONLINE/