U shpërndanë pesë krerë gjedhe për fermerët e Komunës së Gjilanit

Në kuadër të memorandumit të bashkëpunimit mes Komunës së Gjilanit, gjegjësisht, Drejtorisë për Bujqësi dhe Pylltari dhe Shkollës së Mesme të Agrobiznesit dhe Teknologjisë “Sahit Baftiu”, u shpërndanë pesë krerë gjedhe për fermerët e Komunës së Gjilanit.

Drejtori i kësaj Drejtorie, Bajram Isufi ka thënë se këto gjedhe janë të racës Simental, një racë e pastër qumështore, e njohur për prodhimtarinë e lartë dhe cilësinë e shkëlqyer të qumështit.

“Faleminderit drejtuesve dhe stafit të shkollës “Sahit Baftiu” për këtë kontribut të çmuar dhe bashkëpunimin e sinqertë. Gjithashtu, një falënderim i veçantë për Kryetarin e Komunës, Alban Hyseni, për mbështetjen e vazhdueshme në projektet që forcojnë sektorin e bujqësisë”, ka thënë Isufi.

Ai uroi që këto gjedhe fermerëve t’u sjellin mbarësi, prodhim të bollshëm dhe përfitime të mira, duke kontribuar kështu në rritjen e prodhimit vendor dhe zhvillimin e qëndrueshëm të bujqësisë në Gjilan.  /2LONLINE/