U promovua Libri i xhepit i OBSh-së “Kujdesi spitalor për fëmijë”
Organizata Botërore e Shëndetësisë-Zyra në Prishtinë në bashkëpunim me Ministrinë e Shëndetësisë zhvilloi sot një punëtori me pediatër dhe infermierë të Klinikës së Pediatrisë së QKUK-së dhe Spitaleve të Përgjithshme, ku u promovua Libri i xhepit të OBSh-së “Kujdesi spitalor për fëmijë”, që është një udhërrëfyes për menaxhimin e sëmundjeve të rëndomta të fëmijërisë.
Gjithashtu, po në këtë punëtori, nga OBSh dhe MSh u bë edhe shpërndarja e Kartës së të Drejtave të fëmijëve në spital, dokument ky i promovuar më 1 qershor në MSH që ka për qëllim mbrojtjen e të drejtave të fëmijëve gjatë marrjes së shërbimeve shëndetësore në kujdesin spitalor.
Punëtoria e mbajtur iu dedikua në mënyrë primare promovimit dhe përdorimit të Librit të Xhepit të OBSh-së i përkthyer në gjuhën shqipe dhe i përshtatur për kontekstin kosovar nga grupi i ekspertëve vendor të pediatrisë, ndërkohë që pjesëmarrësit në punëtori, të ndarë në grupe, kanë prezantuar raste konkrete të menaxhimit të rasteve pediatrike, duke përdorur udhëzimet që i përmban ky libër.
Dr. Skënder Syla, shef i Zyrës së OBSh-së në Kosovë ka përshëndetur të pranishmit në punëtori duke vlerësuar angazhimin e tyre për përmirësimin e cilësisë së kujdesit shëndetësor në shërbimet pediatrike dhe ka shprehur bindjen se Libri i xhepit do të jetë një udhërrëfyes që do t’i ndihmojë profesionistët në punën e tyre në menaxhimin e sëmundjeve të ndryshme te fëmijët.
Dr. Ramush Bejiqi, kryetar i Shoqatës së Pediatërve të Kosovës ka kërkuar që komuniteti i pediatrisë në Kosovë të rris angazhimet dhe përgjegjësinë e tyre, me qëllim që rezultatet në menaxhimin e sëmundjeve të fëmijëve të jenë dukshëm më të mira se që janë tani.
Dr. Merita Vuthaj, shefe e Divizionit të Nënës dhe Fëmijës në MSh ka falënderuar OBSh-në për përkrahjen, përkthimin, adaptimin dhe botimin e këtij libri dhe bashkëpunimin në avancimin e shërbimeve pediatrike në Kosovë.
Krahas promovimit të Librit të xhepit dhe Kartës për të Drejtat e Fëmijëve në spital, pritjet e punëtorisë ishin që secili institucion të zhvillojë një Plan veprimi për përmirësimin e vazhdueshëm të cilësisë së shërbimeve shëndetësore spitalore për fëmijë.
