U përurua këndi i ri gjithëpërfshirës i lojërave në çerdhen publike “Dardania”

Në një bashkëpunim të ngushtë mes UNICEF-it në Kosovë, të përfaqësuar nga shefja, Veronika Vashchenko, Kryetarit të Komunës së Gjilanit, Alban Hyseni, Drejtorit të DKA-së, Shpend Nuhiu dhe zyrtarja për arsimin parashkollor, Tylaj Hasanaj, u përurua këndi i ri gjithëpërfshirës i lojërave në çerdhen publike “Dardania”.

Drejtoria Komunale e Arsimit (DKA) në Gjilan, vlerëson se ky projekt përfaqëson përkushtimin e përbashkët për të ndërtuar një sistem arsimor gjithëpërfshirës që fillon nga edukimi i hershëm, duke ofruar hapësira ku çdo fëmijë, pa dallim, ka mundësi të luajë, të mësojë dhe të rritet i barabartë me të tjerët.

“Prindërit dhe fëmijët e pranishëm e mirëpritën me entuziazëm këtë hapësirë të re, e cila jo vetëm ofron kushte të sigurta për lojë dhe zhvillim, por edhe nxit bashkëjetesën, respektin dhe mirëkuptimin që në moshë të hershme”, thuhet në njoftimin e DKA-së.

Këndi është dizajnuar për të nxitur përfshirjen e fëmijëve me dhe pa aftësi të kufizuara, duke shërbyer si mjet edukues dhe social që pasuron përvojën e tyre ditore në institucionin parashkollor.

Drejtoria Komunale e Arsimit falënderon znj. Veronika Vashchenko dhe ekipin e UNICEF-it në Kosovë për mbështetjen e jashtëzakonshme në këtë iniciativë, e cila është për herë të parë në Kosovë, dhe pikërisht në Gjilan, që kontribuon drejtpërdrejt në përmirësimin e kushteve të edukimit të hershëm dhe ndërtimin e një sistemi arsimor më gjithëpërfshirës në komunën tonë.  /2LONLINE/