U panë skenarët dhe parapërgatitjet e pushtetit për të marrë gjithçka nën kontroll!

Jemi te prirë që gjithmonë të arsyetohemi se është vetëm fillimi, e gabimet edhe mund të ndodhin dhe janë të pranueshme. Por, po harrojmë që Kuvendi Komunal i Gjilanit është certifikuar ne dhjetor të vitit të kaluar, e edhe pse kanë kaluar pesë muaj që atëherë, nuk kemi as drejtorë të emëruar, nuk e kemi as Komitetin për Politikë dhe Financa funksional, njëjtë sikurse asnjë komitet tjetër.

Arbëreshë Kryeziu – Hyseni

Që nga sot, ka filluar konstituimi i tyre, por që në fillim, u panë skenarët dhe parapërgatitjet e pushtetit, për të marrë gjithçka në duart e veta.

Kjo ndodhi sot në mbledhjen konstituive të Komitetit për Shërbime Publike, ku na u deshtë të prisnim 35 minuta, sepse prezent nuk ishte pikërisht personi i pazareve të LDK-së, që më vonë gjatë mbledhjes edhe u propozua për kryesuese të komitetit, Antigona Kqiku.

Madje pati arsyetime nga më të ndryshmet nga ana e kryesueses së Kuvendit Shpresa Kurteshi-Emini, e cila fillimisht tha se ka një tjetër takim me një tjetër komitetit, i thirrur po ashtu në të njëjtën kohë, gjithashtu përgënjeshtroi se është arritur pajtueshmëri me LVV-në sa i përket udhëheqjes proporcionale të komiteteve, gjë që nuk është aspak e vërtetë, ndërsa në fund tha se është praktikë e saj që mbledhjet konstituive t’i mbajë me të gjithë anëtarët.

Natyrisht që unë si përfaqësuese e Lëvizjes Vetëvendosje! shpreha pakënaqësinë time në lidhje me gjithë këtë skenar dhe votova kundër, por gjithashtu e pyeta kryesuesen e Kuvendit, se çfarë do të ndodhte nëse unë do të mungoja në këtë takim, a do ta mbanin mbledhjen apo jo?

Më tha që është e drejtë e secilit të marrë vendim çfarë të bëjë, por mesa u pa sot, kjo e drejtë nuk i takon përfaqësuesve të pushtetit, prezenca e të cilëve është e obligueshme, kur bëhet fjalë për “grabitje” të pozitave.

Ky gjest sot, dëshmoi edhe njëherë seriozitetin që kjo qeverisje ka, ndaj përgjegjësisë që atyre u takon në raport me qytetarët e Gjilanit.

Autorja është anëtare e Kuvendit Komunal të Gjilanit nga radhët e Lëvizjes Vetëvendosje si dhe anëtare e këtij Komiteti.